238. பீட்டரின் கோர்ட்டில்... - 1

ஊர்பொறுக்கி பலநாளாகிவிட்டபடியால் எங்காவது ஒரு குட்டி பிக்னிக் போவோமென்று நினைத்திருந்த நேரத்தில் பீட்டரின் கோர்ட்டிலிருந்து சம்மன்ஸ் வந்திருப்பதாக நண்பர் சொன்னார். என்ன கோர்ட், எதுக்கு சம்மன் அப்படினு ஒரு பக்கம் இருந்தாலும், போகாமல் இருக்கமுடியாது என்ற காரணத்தால் ஞாயிறன்று கிளம்பினோம்.

சபர்பன் ரயிலில் 40 நிமிடப் பயணம். அங்கே எல்லாமே டூரிஸ்ட் ரேட்டில் இருக்கும் என்று கேள்விப்பட்டிருந்த படியால், இங்கேயே மூட்டை முடிச்சு மற்றும் அத்தியாவசிய பொருட்கள் அனைத்தையும் (அதாவது ரொட்டி, சீஸ், சாலட் இன்னபிற) கட்டிக்கொண்டு சென்றோம்.

ஊரின் பெயர் Peterhof. டச்சு மொழியில் பீட்டரின் கோர்ட் (court) என்று அர்த்தம். ரஷ்யாவின் வெர்ஸாய் என்றும் அழைக்கப்படும் ஊர் இது. சுமார் நூற்றைம்பது நீரூற்றுகளும் (fountains) நான்கு தொடரூற்றுகளும் (Cascades) என அமர்க்களப்படுத்தும் இவ்வூரின் அரண்மனைகள் 'தண்ணி வச்சு காட்டும் வித்தைக்கு' நிகராக வேறொன்றை பூலோகத்தில் காணவியலாது என்று பில்டப் நிறையவே கொடுத்திருந்தார்கள்.

ரயில் நிலையத்தில் இறங்கினால் பேருந்துகள் அனைத்திலும் fountains என்று அடைமொழியில் எழுதிவைத்திருக்கிறார்கள். பத்துநிமிடத்தில் ராட்சத வாயிற்கதவுகளின் அருகில் எங்களை இறக்கிவிட்டார்கள். கடலை, சிப்ஸ், பாப்கார்ன் அதோடு வெகுநாளைக்குப் பிறகு பஞ்சுமிட்டாயும் (அநியாயம் என்னவென்றால் ஒரு மிட்டாய் 1 யூரோ! எனக்கு நம்மூர் எக்ஸிபிஷனும் பீச்சும் நினைவுக்கு வந்து தொலைத்தது) என தயாராய் வைத்திருந்த வஸ்துக்களோடு அரண்மனை காம்ப்ளெக்ஸினுள் நுழைந்தவுடன் வாயைப்பிளந்தபடி எடுத்த படம் இது...

இது முதலில் வரவேற்கும் Midway fountain

அரண்மனைக்கட்டிடம் வரையிலான இத்தோட்டத்திற்கு Upper Gardens என்று பெயர். இதைச்சுற்றி ஒரு ரவுண்ட் வந்தபடியே அரண்மனையை நோக்கி நடக்கத்தொடங்கினோம். அடுத்து வந்தது 92 மீட்டர் நீளமும் 33 மீட்டர் அகலமும் கொண்ட பிரம்மாண்டமான Neptune Fountain.

Neptune Fountain நடுவில்.. வேற யாரு? Neptune தான்...

ஜெர்மன் முறைப்படி அமைக்கப்படிருக்கும் இந்த நீரூற்று ஜெர்மனியால் இரண்டாம் உலகப்போரின் போது திருடப்பட்டு பின்னர் முக்கால்வாசி மீட்கப்பட்டு - என பீட்டர்ஸ்பர்கின் வரலாற்றுச்சின்னங்கள் அனைத்திற்குமான common வரலாறு இதற்கும் உண்டு.

நெப்ட்யூனைத்தாண்டினால் வந்தது Oak Fountain.

இந்த அப்பர் தோட்டம் ஜுஜுபி என்பது போலவும் அரண்மனைக்கு பின்னாலிருக்கும் லோயர் தோட்டம் தான் சுந்தரமானது என்றும் கூகிளாண்டவர் சூடமடித்து சத்தியம் செய்திருந்ததால் அதனை நோக்கி நடக்கத்தொடங்கினோம்.

எல்லாருக்கும் ஏற்படும் வலமா இடமா பிரச்சனையில் அதன் அரசியல்களை விலக்கி - அப்போதைக்கு அரண்மனைக்கு வலது பக்கமே செல்வது என்று ஒரு மனதாக முடிவெடுக்கப்பட்டது.

திரும்பிய திசை அப்படியொன்றும் மோசமானதில்லை என்று ஆறுதலளிப்பது போல வரவேற்றது Fountain of the Square Pool.

இதைத்தாண்டினால் வலதுசாரி என்பது எப்போதுமே கரடுமுரடானதல்ல என்பதாக அரசியல் பேசும் பாதை


கீழெயுள்ள படத்தில் அரண்மனைக்கு மேலே இருப்பது Upper Gardens-ம் நாம் இதுவரை பார்த்த நீரூற்றுகளும். கீழே இருப்பது தான் Lower Gardens. அதைப்பற்றி அடுத்த பகுதியில்...


பிகு: கடைசி படம் மட்டும் வலையில் சுட்டது

(தொடரும்)

213. மன்னர்களின் கிராமம்!

எழுத ஒண்ணும் மேட்டர் பெரிசா இல்லாததால போட்டோ போட்டு கதை சொல்லலாம்னு நினைக்கிறேன். Tsarskoye Selo (மன்னர்களின் கிராமம்) பீட்டர்ஸ்பர்க் நகரத்திலும் அதன் சுற்றுப்புறத்திலும் இருக்கும் பல அரண்மனை வளாகங்களில் முக்கியமானது.

இந்த வளாகத்தில் இரண்டு முக்கியமான அரண்மனைகள் இருக்கின்றன. அவற்றின் உள்ளே பிறிதொரு நாள் செல்லலாம். அதுவரைக்கும் வெளியே சுற்றுவோம்.

மென்ஷிக்கோவ் என்பவருக்கும் சொந்தமான இடத்தை 1708-ல் பீட்டர் மன்னர் (Peter the Great) தன் மனைவி கேத்தரீனுக்கு பரிசாக அளித்தார். கேத்தரீன் ராணியானபின் உருப்பெற்றதே இந்த வளாகம். சுமார் 750 ஏக்கர்கள் பரந்துவிரிந்து கிடக்கிறது அரண்மனைகளும் சுற்றியுள்ள தோட்டங்களும். அரச குடும்பத்தினரின் கோடைக்கால வாசஸ்தலமாக சுமார் இரண்டு நூற்றாண்டுகள் பிரபலமாக இருந்தது. அதற்கப்புறம் என்னாயிற்று என்று கடைசியில் பார்ப்போம். அதற்கு முன்னர் வளாகத்தினுள் நுழைவோம்.

சீராக பராமரிக்கப்படும் தோட்டமும் அதிலுள்ள சிற்பங்களும் அட்டகாசமானவை. அரண்மனையின் பிராதான கட்டடத்துக்கு செல்லும் அழகிய பாதை இதோ...

1. The Main Alley




இதே பாதையில் முன்னே சென்றால் இரு குளங்களைக் காணலாம். வலப்புறம் இருப்பது கண்ணாடிக்குளம் என்றழைக்கப்படுவது. ஏன் என்று சொல்லவேண்டியதில்லை என்று நினைக்கிறேன். அதில் தெரியும் மஞ்சள் கட்டடம் அரச குடும்பத்தினரின் தனிப்பட்ட குளியல் குதூகலங்களுக்கானது. :) இரண்டாம் உலகப்போரின் போது முற்றிலுமாக அழிக்கப்பட்டிருந்தாலும் 1950 களில் அசலுக்கு இணையான முறையில் புணர்நிர்மாணம் செய்யப்பட்டது.


2. The Mirror Pond and The Washroom of their Highnesses




முதலாவது எகேத்தரீன் ராணி (Catherine the Great) இங்கே தன் வாழ்க்கையின் பெரும்பாதியை கழித்த அரண்மனை. முற்றிலுமாக புணர்நிர்மாணம் செய்யப்பட்டு கண்ணைக்கவரும் ரஷ்யன் பரோக் வடிவமைப்பில் ஜொலிக்கிறது. செயிண்ட் பீட்டர்ஸ்பர்க்கிலுள்ள ஹெர்மிடாஜ் அரண்மனைக்கும் இதற்கும் வடிவமைப்பில் நிறைய ஒற்றுமைகள் இருப்பதை எளிதில் கண்டுகொள்ளலாம். இதன் பிரம்மாண்டத்தையும் நீலம், வெள்ளையுடன் தங்கம் ஜொலிப்பதை போட்டோவில் justify செய்ய முடியாதென்றே நினைக்கிறேன். உலகப்போரின் போது பெரும் சேதமடைந்த இந்த அரண்மனையில் மொத்தம் 57 அறைகள் இருந்திருக்கின்றன. இப்போதோ வெறும் 29 மட்டுமே பொதுப்பார்வைக்கென திறக்கப்பட்டுள்ளன. மற்றவற்றில் இன்னமும் வேலைகள் நடைபெறுகின்றன. இவ்வரண்மனைக்குள் இருக்கும் அறைகள் உலகின் மற்ற அரச குடும்பங்களையே கூனிக்குறுக செய்துவிடும் அளவுக்கு இருப்பவை. உதாரணமாக இங்கே சென்று பார்க்கலாம்.

அரண்மனையைச் சுற்றி ஆங்கில ஸ்டைலில் சிறிய structured parkஉம் அதைச் சுற்றி பரந்த landscaped parkஉம் இருக்கின்றன.


3. Baroque Facade of The Catherine Palace




சார்லஸ் கேமரோன் என்ற ஸ்காட்லாந்தைச் சேர்ந்த கட்டிடவியல் வல்லுநரை பணிக்கமர்த்தி உலகின் பல்வேறு கலாச்சாரங்களின் கட்டிட சின்னங்களை ஒரே இடத்தில் கொண்டு வர கேத்தரீன் ராணி விரும்பினார். விளைவு ரோமன் தூண்களும், பாபிலோனியா ஸ்டைலில் தொங்கும் தோட்டங்கள் என புதையலே இருக்கிறது.

4. Cameron Gallery









அருகிலுள்ள பெரிய ஏரியை சுற்றி அழகான நடைபாதை போட்டு வைத்திருப்பதால் நடக்க அருமையான இடம். பகோடாக்கள், எகிப்தின் ஓபெலிஸ்க்கள் என பல காட்சிகளில் முதன்மையானது முற்றிலும் மார்பிளால் ஆன இந்தப் பாலம்.
6. The Marble Bridge





டூரிஸ்ட்களின் தாகம் தீர்க்க அரண்மனை வாயிலில் முளைத்திருக்கும் கபேயிலிருந்து...
7. The Regular garden - view from the cafe





ஓரளவுக்கு சுத்தியாச்சா.. சரி கொஞ்சம் தாண்டி அரண்மனைக்கு பின் பக்கம் போவோம். சுற்றுலாப்பயணிகளின் கண்களில் இன்னும் அவ்வளவா படாதது இது. அலெக்ஸாண்டர் அரண்மனை. கேத்தரீன் பாட்டி தன் செல்லப்பேரன் அலெக்ஸாண்டர் பாவ்லோவிச்சுக்காக ஆசைஆசையா கட்டினது இது. கேத்தரீன் அரண்மனைக்கும் முற்றிலும் மாறுபட்ட வடிவில் இருக்கும் இவ்வரண்மனையும் அதைச் சுற்றியிருக்கும் தோட்டமும் இன்னமும் முழுதாக புணரமைக்கப்படவில்லை. காரணம் முற்றிலுமாக ஜெர்மானியர்கள் ஆக்கிரமிப்பின் போது அழிக்கப்பட்டதுதான்.

இவ்வரண்மனைக்கு இன்னும் ஒரு 'சிறப்பு' இருக்கிறது. பின்னால் இருக்கும் கேத்தரீன் ரஷ்ய அரச பரம்பரையின் பொற்காலத்தை காட்டுகிறது என்றால் இவ்வரண்மனையில் தான் அரச பரம்பரையே முடிவுக்கு வந்தது. 1917-ல் புரட்சிப்படையினரால் சைபீரியாவுக்குச் அழைத்துச் செல்லப்பட்டு கொல்லப்பட்டனர் என்று பலருக்கும் தெரியும். ஆனால் அதே வருடம் மார்ச் முதல் ஆகஸ்ட் மாதம் நிக்கோலாஸ் II மன்னரும் அலெக்ஸாண்ட்ரா ராணியும் அவர்களின் ஐந்து குழந்தைகளும் இங்கேதான் வீட்டுக்காவலில் வைக்கப்பட்டிருந்தனர். நிக்கோலாஸும் அலெக்ஸாண்டராவும் தோட்டங்களில் உலாவ பெருந்தன்மையாக அனுமதிக்கப்பட்டிருந்தார்களாம்! என்ன கொடுமை சரவணன் இது?

அவர்கள் நினைவாக ஒரு சிறிய மார்பிள் தக்டு இருக்கிறது அரண்மனையின் பிரம்மாண்டமான வாயிலில். அவ்வளவுதான். அரச பரம்பரையின் வரலாறு முற்றும் என்று நினைவுபடுத்தும் வகையில்.


8. Ruins of Alexander Palace




நியு யார்க் டைம்ஸில் 1917-ஆம் வருடம் நிக்கோலாஸின் வீட்டுச்சிறைப் பற்றி வந்த கட்டுரை.


அதிகாரப்பூர்வமான தளம்

----
இவற்றைத் தவிர அலெக்ஸாண்டர் லைசியம் (Lyceum) என்ற கல்வி நிறுவனமும் இங்கே இருக்கிறது. இதன் மிகப் பிரபலாமான மாணவர் அலெக்ஸாண்டர் செர்கெயெவிச் புஷ்கின். ரஷ்யாவின் முதன்மையான கவிஞர் என்று கருதப்பட்டவ்ர். இவரின் நூற்றாண்டை ஒட்டி 1930களில் இந்த ஊருக்கே புஷ்கின் என்று பெயர் சூட்டியது சோவியத் அரசு. பெரும்பாலான ஊர்களைப் போல் அதன் பழமையான பேரே மீண்டும் வைக்கப்பட்டிருக்கிறது, சோவியத் வீழ்ச்சிக்கு பிறகு.

207. நன்றி! மீண்டும் தருக!

தொண்டர்கள் மனமுவந்து கொடுத்த ஒவ்வொரு ரூபாய் நன்கொடையைக் கொண்டு வாங்கிப்போட்டிருக்கும் வீட்டின் புகைப்படங்கள் சில.

1. A fine mantlepiece
2. The Italian Hall

3. The Main Staircase

4. The Flemish Hall

5. An exquisite door

6. The Dutch Hall

7. The Greeks and their Statuettes

7. Adonis and Cupid

இதை வாங்கறதுக்கே நிதி மொத்தமும் செலவாயிட்டதால, என் இனமானத் தொண்டர்களே!

இதோடு சோர்ந்துவிடலாமா? இன்னும் உங்களின் அன்புக்குரிய கட்சியின் உப தலைவர் மவுண்ட் ரோடில் அண்ணா சாலையில் டிவி ஸ்டுடியோ மற்றும் ஆபீஸ் தொடங்க வேண்டாமா? லண்டனில் ஹோட்டல் வாங்க வேண்டாமா? பாண்டிச்சேரியில் மெடிகல் காலேஜ் கட்டவேணாமா?

ஆதலால் பொங்கியெழுங்கள். நிதி சுருட்டுங்கள்.

நீங்கள் தரும் ஒவ்வொரு ரூபாய்க்கும் முன்கூட்டி இப்பவே என் நன்றி! நன்றி! நன்றி!

------

பி.கு:1. காசோலைகள் மற்றும் வரைவோலைகளை நேரடியாக என் பெயரிலேயே அனுப்பிவைக்கலாம்.

2. நீங்கள் திரட்டித்தரப் போகும் கட்சி உப தலைவர் சுகவாழ்வு நிதிக்கு இன்கம்டாக்ஸ் வரிவிலக்கு கிடையாது.

---------

ஹெர்மிடாஜின் படங்கள் மேலும்

205. வந்தேன் வந்தேன்! மீண்டு(ம்) நானே வந்தேன்!

ஒரு மாசமாவது தமிழ்மணம் மற்றும் தமிழ்வலைப்பதிவுலக பக்கமே எட்டிப்பாக்காம இருந்தா பைத்தியம் பிடிக்குதா இல்லியான்னு செஞ்சுகிட்ட சுயபரிசோதனை எக்ஸ்ட்ராவா அப்படி ஒரு மாசம் இருந்தும் பைத்தியம் பிடிக்காம தோல்வியில் முடிஞ்சே விட்டது. இதுக்கு நடுவுலே மோகன்தாஸைத் தவிர வேற ஒருத்தர் கூட 'ஏண்டாப்பா எழுதறத விட்டுட்டே'ன்னு கேட்காததிலிருந்து எல்லாருக்கும் என்னோட தாக்கம் நிறைஞ்ச எழுத்துகளக் கண்டு பொறாமை என்பதையும் அனைவரும் 'இவன் எப்ப போவான் திண்ண எப்ப காலியாவும்'னு காத்திருந்தா மாதிரியே மவுனம் காத்த விதத்தை மறப்போம் மன்னிப்போம் வகையறாவில் சேர்த்து....

கடைசியில்... எவ்வளவு நாட்களுக்குத்தான் அறிவார்ந்த தெளிந்த அனாலிஸெஸ்கள் மூலம் சமூகத்தை கொத்துபுரோட்டா போட்டு கொத்தி, திடீர் சீர்த்திருத்த இடியாப்பம் இடித்து மற்றும் இன்னபிற ஆத்மவிசாரங்களை மத்தவங்க எழுத - நான் படிக்கிறது? இப்படி ஒன்சைடடா போறதவிட டூப்பு விட்டாவது டூப்ளே ஆக்கணும்னு அதெல்லாத்தையும் ஒண்ணு ரெண்டு மூணுன்னு சிவாஜி மாதிரி கவுண்ட் வச்சுகினு இப்போ ரிட்டர்ன் பண்ண வந்தாச்சு.

இன்னும் ஆயத்தப்பணிகள் நடந்து கொண்டிருக்கிறதென்றபடியால், இப்போதைக்கு படம் மட்டும் போட்டு கிளம்பறேன். தெரியலேன்னு புலம்ப மீண்டும் ப்ளாக்கர் பகவான் அருளென்றென்றைக்கும் தடையின்றி இருக்குமென்று பணிவுடன் வேண்டியபடியே இதோ படங்கள்.
வழக்கம்போல் செயிண்ட் பீட்டர்ஸ்பர்க் படங்கள்.

1. The Winter Palace



2. Kazanskiy Sobor



3. View from the Fontaka Most


4. The Throne Room


5. The Room of the Russian Generals


6. REDRUM The Red Room


7. The Marble Hall


8. The Golden Room


9. The Corridor


டிஸ்கி: உப்புமாவுக்கு டிஸ்கி செக்ஷன் இல்லேன்னா ரிஸ்கி. அதனால சம்பிரதாயத்துக்காக இது.

197. No Oil for You! - Russia vs Estonia

சைன்பெல்டோட சூப் நாஜி நினைவுக்கு வர்றாரா? அவர் குடுக்கற சூப்ப வாங்கிட்டு அடக்கமா போகணும். கேள்வி கேட்டாலோ வேற ஏதாவது தப்பு சொன்னாலோ சூப்ப திரும்ப பிடுங்கிட்டு "no Soup for you"னு சொல்லித்துரத்திடுவாரு.

கிட்டத்தட்ட அதே கதை நடக்குது. என்ன கொஞ்சம் பெரிய அளவுல. போன தடவை ரஷ்யா உக்ரைனோட விளையாடினப்போ வேடிக்கை பார்த்த இ.யூ இந்த தடவை கோதாவுல இறங்கியிருக்கு.

முன்கதைச்சுருக்கம்: வழக்கம்போல எஸ்டோனியால ஆரம்பிக்குது. எஸ்டோனியாங்கறது ஒரு குட்டி பால்டிக் நாடு. சோவியத் யூனியனோட பாதுகாப்பிலேர்ந்து வெளியேறி 2004ல ஐரோப்பிய கூட்டமைப்புல இணைஞ்சுது.

இப்ப எஸ்டோனியா காரங்க என்ன செஞ்சாங்கன்னா அவங்க தலைநகரான டாலின்ல இருக்குற ஒரு சோவியத் கால சிலைய எடுத்து வேற இடத்துல வப்போம்னாங்க. சாதா சிலையா இருந்தா ரஷ்யாவும் கண்டுக்காம இருந்திருக்கும். ஆனா இது என்ன சிலைன்னா இரண்டாம் உலகப்போர்ல சிவப்பு ராணுவம் பாஸிஸத்த ஜெயிச்சு வெற்றிபெற்றதுக்கான நினைவுச்சின்னம். சில சோவியத் ராணுவத்தினரோட உடல்களும் அங்க அடக்கம் செய்யப்பட்டிருக்கு அந்தச் சிலைய சுத்தி. அந்த உடல்களையெல்லாம் தோண்டி எடுத்து யாருயாருன்னு identify பண்ணி வேறொரு இடுகாட்டில புதைக்கப்போறோம்னு எஸ்டோனியா சொல்லிச்சு.

ரஷ்யா ரொம்ப பெருமைப்பட்டுக்கற விஷயம்னா இந்த இரண்டாம் உலகப்போர் வெற்றிதான். அமெரிக்காவும் அதன் கூட்டாளிகளும் சேர்ந்து இழந்த ஆட்களவிட பலமடங்கு அதிகம் ரஷ்யர்கள் இறந்துபோயிருக்காங்க. செயிண்ட் பீட்டர்ஸ்பர்க் நகரமே நரகமா இருந்துச்சு. அப்புறமா இந்த சிவப்பு ராணுவம் சுதாரிச்சு அதிவீரத்தோட போராடி கிழக்கு ஐரோப்பாவுலேர்ந்து ஹிட்லரோட படைய விரட்டியடிச்சு முதல்ல பெர்லினப் பிடிச்சது வரைக்கும் வரலாறு. இந்தப் போர்ல பங்கெடுத்தவங்களுக்கு வருஷாவருஷம் அஞ்சலி செலுத்தி அதையே பெரிய விழாவாவும் கொண்டாடுறது ரஷ்ய வழக்கம். இப்படி தங்களோட வெற்றிக்கு, பாஸிஸத்தின் அழிவுக்கு சின்னமாக இருக்கும் சிலைய அகற்றக்கூடாதுன்னு எஸ்டோனியால மூணில் ஒரு பங்கு இருக்கற ரஷ்யக்குடியினர் குரலெழுப்பினாங்க. அதுக்கு எஸ்டோனியா நாட்டுக்காரங்க ஜெர்மனி காலனியா இருந்தோம், அப்புறம் சோவியத் காலனியா ஆனோம் இதுல பெருமைப்பட என்ன இருக்கு... எங்களை அம்பது வருஷம் அடிமையா வச்சிருந்த சோவியத்தின் சின்னம் வேணாம்னு சொல்ல ஆரமிச்சுட்டாங்க. ரஷ்யக்குடியினர் சேர்ந்து ஆர்ப்பாட்டமெல்லாம் நடத்தி போலீஸோட சண்ட போட்டதுல ஒருத்தர் செத்தும் போயிட்டாரு. நூத்துக்கணக்கான ரஷ்யக்குடியினர் கைதுசெய்யப்பட்டாங்க. இது நடந்தது ஏப்ரல் 24.

இப்போ ரஷ்யாவோட கண்ல இது பட்டுருச்சு. அது எப்படி சோவியத் காலச் சின்னத்த, அதுவும் ரஷ்யர்களோட பெருமைக்கு சின்னமா இருக்குற ஒரு சிலைய இடமாத்தம் செய்வீங்க.. அதோடு கூட புதைக்கப்பட்ட உடல்களை திரும்பவும் தோண்டி எடுக்குறது ரொம்ப கீழ்த்தரமானதுன்னு அறிக்கைவிட ஆரமிச்சாங்க. சொல்லிப்பாத்தாங்க கேக்கலை. அரசியல் கலந்தா அப்புறம் சூடுக்கு பஞ்சமா? அமெரிக்கா வேற அது எஸ்டோனியாவோட சொந்த விவகாரம்னு சொல்ல ஆரமிச்சோன்ன ரஷ்ய அரசியல் கட்சிகள் சில nationalism த்த கையிலெடுத்தாங்க. மாஸ்கோவோட மேயர் லுஷ்கோவ அறிக்கைவிட்டாரு "ரஷ்யக்கடைகள்ல எஸ்டோனியப் பொருட்களை விற்கக்கூடாதுன்னு". Sedmoi Continent, Kopeika மாதிரி பெரிய பெரிய சூப்பர் மார்க்கெட் செயின்களெல்லாம் கூட இதுல சேந்துக்க ஆரமிச்சாங்க. ஆனா இந்த மாதிரி புறக்கணிப்புகள்னால, க்யூபாவுக்கு எதிர்த்தாப்புல அமெரிக்கா செஞ்சா மாதிரி, ஒரு *யிரும் செய்யமுடியாதுன்னு புரிஞ்சு பழைய அஸ்திரத்த எடுக்க ஆரமிச்சுருச்சு ரஷ்யா.

அதான் வழக்கமான எண்ணெய் எரிவாயு அஸ்திரம். ரஷ்யாவோட மொத்த எரிவாயு மற்றும் எண்ணெய் ஏற்றுமதியில இருபத்திஐந்து சதவிகிதம் எஸ்டோனியாவுக்கு ரயில் மூலமா போய் அங்கேர்ந்து எஸ்டோனியாவோட பங்குபோக மிச்சம் ஐரோப்பாவுக்கு போகுது. மே. 1 லிருந்து ரயில் கம்பெனி எஸ்டோனியா போற ரயில் பாதைய சீரமைக்க போறதா திடீர் அறிக்கைவிட்டு ரயில் போக்குவரத்த பலமடங்கு குறைச்சிருச்சு. இதுமூலமா எஸ்டோனியாவுக்கும், அதன்மூலமா ஐரோப்பாவுக்கும் வரவேண்டிய எரிவாயு வராம சிக்கல் ஏற்பட்டிருக்கு. இதுனால ஏற்றுமதி செய்கிற ரஷ்ய எண்ணெய், கருநிலக்கரி மற்றும் எரிவாயு கம்பெனிகள் ஐரோப்பாவுக்கு அனுப்ப உக்ரைனிய மற்றும் ரஷ்ய துறைமுகங்கள் வழியா அனுப்புவோம்னு சொல்லிருக்காங்க. ரயில்வே நிர்வாகத்தினர் இதுக்கு சுத்தமா அரசியல் சம்பந்தமேயில்லேன்னு அறிக்கைவிட்டாலும் நம்பறது கஷ்டமா இருக்கு.

இதுதவிர, நாஷி "Ours" அப்படின்னு சொல்லி ஒரு அமைப்பு. ரொம்ப nationalist ஆளுங்க. மாஸ்கோவுல எஸ்டோனியாவோட தூதரகத்துக்கு முன்னாடி கடந்த ஆறு நாட்களா கூடாரமே போட்டு "No To Fascists Estonia"னு கலாட்டா செய்ய ஆரமிச்சாங்க. இதுனால தூதரகத்து செயல்பாடுகள் பாதிக்கப்படுதுன்னு எஸ்டோனியா சொல்லியும் போலீஸ் அவங்களை கைது செய்யல. அதுனால தூதரக அலுவல்கள் தற்காலிகமா முடக்கப்படும்னு எஸ்டோனியா சொல்லிருச்சு. இதத்தவிர ரஷ்ய-எஸ்டோனிய பார்டர்லயும் இதே ஆளுங்க சேர்ந்து cross border trafficஐயும் தொல்லைப்படுத்தறத செய்திகள் வர ஆரமிச்சுருச்சு.

அதுனால எஸ்டோனியா தன் பக்கத்து நியாயத்த ரஷ்ய மக்களுக்கு சொல்லியாகணும்னு நினைச்சு நேத்திக்கு (02/05/07) எஸ்டோனியாவோட ரஷ்யத்தூதர் மரீனா கல்ஜூரன் ஒரு பிரபலமான நாளிதழோட அலுவலகத்துல பிரஸ் மீட் வச்சாங்க. அது நடந்துகிட்டிருக்கும்போது இந்த நாஷி ஆளுங்க உள்ள புகுந்து கலாட்டா செஞ்சு, தூதரோட பாதுகாப்பு அதிகாரிங்க pepper spray எல்லாம் பயன்படுத்தி தூதர கார்ல ஏத்த படாதபாடு பட்டுருக்காங்க. ஆனா தூதர் மேல எந்தக் காயமும் இல்லை. அவங்க காரைத் துரத்திகிட்டே கொஞ்ச தூரம் நாஷி ஆளுங்க ஓடிருக்காங்க.

நேத்திக்கே சாயந்திரமா எஸ்டோனிய தூதுவர பாத்துட்டு தூதரகத்துலேர்ந்து வெளியே வந்த ஸ்வீடிஷ் தூதுவரோட காரும் தாக்குதலுக்கு உள்ளாயிருக்கு. குழப்பத்துல எஸ்டோனியா தூதுவர்னு நினச்சு ரவுடிக்கும்பல் ரகளை செஞ்சிருச்சு. காரோட சைட் வ்யூ மிரர்கள் உடஞ்சி, ஸ்வீடிஷ் கொடி கிழிக்கப்பட்டு போலீஸ் வந்து காருக்குள்ள பாதுகாப்பா இருந்த தூதுவர சுத்தி கேரோ செஞ்சிகிட்டிருந்த நாஷி ஆட்கள கைதுசெய்ய பதினஞ்சு நிமிஷம் ஆயிருச்சு. இங்கேயும் தூதுவர்மேல கைகூட படல. இந்த ரெண்டு நிகழ்ச்சிகளிலும் போலீஸால கும்பல கைதுசெஞ்சு கேஸெல்லாம் போட முடியல. ஏன்னா ரஷ்ய கிரிமினல் விதிகளின் படி இந்த மாதிரி demonstrations நடத்த பொதுமக்களுக்கு முழு உரிமையும் உண்டு. ஆனா பாதிக்கப்பட்ட ஆளுக்கு அடியோ காயமோ பட்டாலேயொழிய ரகளை செஞ்சவங்களுக்கு வெறும் அபராதம் மட்டும்தான் விதிக்கமுடியும். அதையே செஞ்சு போலீஸும் விட்டிருச்சு. அதுக்கப்புறம் கலாட்ட செஞ்ச அமைப்போட செய்திக்குறிப்புகள்ல தவறா ஸ்வீடிஷ் தூதுவர் கேரோ செய்யப்பட்டதுக்கு மன்னிப்பு கேட்டிருக்காங்க.

ஸ்வீடீஷ் தூதுவர் நேரா ரஷ்ய வெளியுறவுத்துறை அமைச்சர்கிட்டயே போய் முறையிட்டும் வேற ஒண்ணும் செய்ய முடியலை. இதுதவிர ஸ்வீடன் நாட்டு வெளியுறவுத்துறை அமைச்சகம் ரஷ்ய தூதர கூப்பிட்டு கண்டனம் சொல்லிருக்கு. இதுஇப்படியிருக்க, எஸ்டோனிய அதிபர் Toomas Hendrik "try to remain civilized"னு ரஷ்யாவ பாத்து சொல்லிருக்காரு. இதுக்கப்புறமும் இ.யூ சும்மா இருக்கமுடியுமா? ரஷ்யாவுல இருக்கிற ஐரோப்பிய ஒன்றியத்த சேர்ந்த தூதுவர்களுக்கும் தூதரகங்களும் பாதுகாப்பு அளிக்க வேண்டியது வியன்னா கன்வென்ஷன்ல கையெழுத்து போட்டிருக்கிற ரஷ்யாவோட கடமைனு அறிக்கை விட்டிருச்சு. இது என்னன்ன எரியிற தீயில எண்ணெய ஊத்துறா மாதிரி. அவங்க அறிக்கைல எஸ்டோனியாவுக்குன்னு சொல்லலை. ஐரோப்பிய ஒன்றியத்த சேர்ந்தன்னு சொல்லி எஸ்டோனியா எங்காளு, நீ(=ரஷ்யா) வெளியில தனிமைல இருக்குற நாடுங்கறா மாதிரி சொன்னது இப்ப இங்க பிரச்சனையாப் போச்சு.

அமெரிக்கா வேற போலந்துல ஏவுகணைத்தளம் அமைக்கப்போறோம்னு சொல்லிகிட்டிருக்கு. அத ரொம்பத் தீவிரமா எதிர்க்குது ரஷ்யா. ஏன்னா ரஷ்யாவோட ஏவுகணைகள்தான் அதோட primary deterrent. வடகொரியாவுக்கும் ஈரானுக்கும் எதிராத்தான் இந்தத்தளம்னு அமெரிக்கா சொன்னாலும் பூடின் ஒத்துக்கல. ஏன்னா இந்த ஏவுகணைத்தளம் போலந்துல வந்துட்டா ரஷ்யாவோட strategic defense பல்லிளிக்க ஆரமிச்சுரும்.

இப்போ இந்த வெளியுறவுத்துறை பிரச்சனை வேற. பூடினுக்கு இன்னும் ஓராண்டே பதவி பாக்கி இருக்கற இந்த நேரத்துல அமெரிக்கா ஒருபக்கம் ஐரோப்பிய ஒன்றியம் ஒருபக்கம், இதுதவிர தனியா உள்நாட்டுல ஆங்காங்கே பெரிய அளவுல anti government protests.. எல்லாத்தையும் எப்படி சமாளிக்க போறார்னு பொறுத்திருந்துதான் பார்க்கணும்.

-------------
எழுத ஒண்ணுமேயில்லாத நேரத்துல இந்தமாதிரி ஏதாவது வந்து அவலாயிடுது. அந்த வகையில எஸ்டோனியாவுக்கு ரொம்ப நன்றி. என்ன குரூரமான ஆளுன்னு வாயடைச்சு போயிடாதீங்க. இருநூறத் தொடறது ரொம்பவே கஷ்டம்பா...பட்டாதான் தெரியும். :))
------------
சுட்டீஸ்:
http://www.moscowtimes.ru/stories/2007/05/03/001.html
http://www.spiegel.de/international/europe/0,1518,480739,00.html
----------
UpDates on 04/05

இன்றைக்கு எஸ்டோனியாவின் அதிபர் அலுவலகம் அமெரிக்க உள்துறைச் செயலர் காண்டோலீஸா ரைஸ் இவ்விஷயத்தில் எஸ்டோனியாவை ஆதரிப்பதாக தொலைபேசியில் சொன்னதாக அறிவித்துள்ளது.

எஸ்டோனியாவின் கோரிக்கைக்கு இணங்க நாடோவும் ஐ.ஒன்றியமும் மிகக் கடுமையான முறையில் ரஷ்யாவை கண்டித்துள்ளன. ஐ.ஒன்றியம் WTOவில் ரஷ்யா சேர்வதற்கு இது இன்னுமொரு தடைக்கல் என்ற தொனியில் அறிக்கை விட்டுள்ளது. வரும் மே.18 ஐ.ஒ-ரஷ்ய மாநாடு சமாராவில் நடக்க இருப்பது குறிப்பிடத்தக்கது.

எஸ்டோனிய தூதர் இருவார விடுமுறையென தாய்நாட்டிற்கு சென்றுவிட்டார். நாஷி அமைப்பு ஆட்கள் எஸ்டோனிய தூதரகத்தின் முன் நடத்திவந்த ஆர்ப்பாட்டத்தை, தங்கள் கோரிக்கைக்கு ஏற்ப தூதர் வெளியேறிவிட்டதால், நிறுத்திக்கொள்வதாக அறிவித்துள்ளது.

177. சக்கரவர்த்தி திரு(ட்டு)மகன்

தமிழ்நாட்டை விட்டு மாஸ்கோவுக்கு வந்தபுதிதில் கொஞ்சம் வியந்துதான் போனேன். இங்குள்ள கட்டிடங்களையும், அவற்றின் அழகையும் பார்த்துமட்டும் அல்ல. Piracy என்னும் பேய் செய்யும் அட்டகாசங்களை பார்த்து. நம்ம ஊரு பஸ் ஸ்டாண்டு ப்ளாட்-ஃபாரத்துல விற்கப்படும் கண்ணாடி, சீப்பு, சோப்பு டப்பாக்களைப்போல மைக்ரோசாஃப்டும், மாக்ரோமீடியாவும், அடோபியும் கூறுகட்டி விற்கப்பட்டதை பார்த்து. இது தவிர, உலகத்துல யாரெல்லாம் மென்பொருட்கள் பண்றாங்களோ அவங்களோட படைப்புகளையும் தெருவுக்கு கொண்டுவந்துவிடுகிறார்கள்.

மென்பொருள்-னு நான் சொல்றது பீ.ஸி-விளையாட்டுக்களில் தொடங்கி அன்றாடம் நாம் பயன்படுத்தும் தளங்கள் (OS), மேசை பிரசுர செயலிகள் (Desktop Publishing), தினசரி உபயோகிக்கும் Media Players/Converters, CD-Writing, Anti-Virus, அறிவியல் மென்பொருள், உலக இசை படைப்புகள் (MP3 வடிவில்), இப்படி ஒன்றையும் விட்டுவிடாமல் எல்லாமே கிடைக்கும். ஒரு மென் தட்டை (CD)
எடுத்துக்கொண்டால், அதனுடைய 650 MBக்குள் எத்தனை செயலிகளை நிரப்பமுடியுமோ அத்தனையும் நிரப்பி ஒரு கூட்டாஞ்சோறாக கொடுப்பார்கள். இதில் பல வகை உள்ளது. ஒன்று, ஒரு நிறுவனத்தின் பொருட்களை மட்டும் நிரப்புவது, எ.கா-வாக, மாக்ரோமீடியா என்று எடுத்துக்கொண்டால், அவர்கள் நிறுவனத்தைத் தொடங்கியது முதல் நேற்று வெளியிட்ட மென்பொருள் வரை அனைத்தையும் அதில் நிரப்பிவிடுவார்கள். இப்படி நிறுவனங்களுடைய செயலிகளை மொத்தமாக பிரித்துவிடுவது. இரண்டாவது, செயலிகளை ஜாதிவாரியா பிரித்து வெளியிடுவது. எ.கா-உலகின் பல்வேறு நிறுவனங்கள் வெளியிடும் மேசை பிரசுர செயலிகளினுள் மிகச்சிறந்தவையை தேர்ந்தெடுத்து அவற்றை ஒரு தட்டில் நிரப்பிவிடுவது. இப்படி ஒன்ரிரண்டு தட்டுக்களை வாங்கிக்கொண்டுவந்து வீட்டில் உட்கார்ந்து அவைகளின் உண்மைவிலைகளை இணையதளங்களில் தேடிபார்த்தால், ஒரு மென்பொருள் தட்டின் விலை 1000 அல்லது 1500 டாலர்களைத்தாண்டும்.

படத்தில் காண்பது 'Multimedia' என்ற பிரிவில் வெளிவந்துள்ள ஒரு தட்டின் உறை (டிவிடி-யில்)

பல இடங்களில், மிகவும் விலை உயர்ந்த SAP, Oracle, Avid போன்ற நிறுவனங்களின் செயலிகளும் கிடைக்கும். இவைகளெல்லாம், பெரிய பெரிய நிறுவனங்கள் பயன்படுத்தும் செயலிகள். ஒருமுறை வீடியோ படத்தொகுப்புக்கென ஒரு தட்டினை வாங்கினேன். அதில் Avid Newscutter XP என்ற ஒரு செயலி இருந்தது. அதனைப் பற்றி இணையத்தில் தேடியதில், அது உலகின் மிகப் பெரிய தொலைக்காட்சி நிறுவனங்களும், ஹாலிவுட் ஸ்டுடியோக்களும் பயன்படுத்தும் செயலி என்று அறிந்தேன். அதன் விலை? அதிகமில்லை ஜென்டில்மென், பிச்சைக்காசு 7000 டாலர்கள்தான். இத்தனைக்கும் அந்த செயலி, வாங்கிய தட்டிலிருந்த பல செயலிகளில் ஒன்றுதான். அதைத்தவிர, அடோபி, பின்னகிள், இப்படி பல நிறுவனங்களின் செயலிகளும் அதில் அடக்கம்.


மென்பொருள் தட்டு உறையின் பின்புறம்

இந்த திருட்டு தயாரிப்புகளுக்கு அமோக வரவேற்ப்பு இங்கே. இதற்கு பல காரணங்கள் உள்ளது. விலையில் இவை மிகக்குறைவு என்பது ஒரு காரணம். மாஸ்கோவிலோ, சான்க்ட் பீட்டர்புர்கிலோ நான் பார்த்தவரை அனைவருமே ஒரே விலைதான். அதாவது, ஃப்லாட் ரேட்டாக, ஒரு தட்டு 70 ரூபிள்கள் (Roubles). இது டாலர் கணக்கில் 2.4$ வரும். கிடைக்கும் பொருளின் தரத்தோடு ஒப்பிடும்போது, இது சில்லரைக் காசுதான். ஆனால், விலை குறைவாக இருந்தாலும், ஒவ்வொரு தட்டும், அதை அவர்கள் செய்திருக்கும் தரமும் வியக்கவைக்கும். முதலில், வெளிப்புரத்தை எடுத்துக்கொண்டால், ஒவ்வொரு சிடி-க்கும் கண்டிப்பாக ஒரு சிறப்பான Plastic Case கிடைக்கும். அந்த உறையின் முகப்பில், உள்ளிருக்கும் மென்பொருள்களில் சிறந்தவைகளை குறிப்பிட்டு அவற்றுக்கு தொடர்புடைய அழகான படம் ஒன்று பின்னணியில் இருக்கும். மேலும் பின்புறத்தில், உள்ளடங்கிய மென் பொருட்கள் ஒவ்வொன்றின் விபரம் அழகாக அச்சிடப்பட்டு காணலாம். பார்ப்பவர்களுக்கு, ஏதோ ஒரு அசல் நிறுவனமே வெளியிடும் பொருளைப்போல இருக்கும்.

வெளியில் அப்படி என்றால், தட்டின் உள்ளேயும் ஒரு நேர்த்தியை காணலாம். தட்டை கனிணியுள் செலுத்தியவுடன் Auto-run ஆகும் பட்சத்தில், Flash அல்லது HTMLலில் செய்யப்பட்ட ஒரு பக்கம் தொடங்கிவிடும். உள்ளிருக்கும் செயலிகளைப்பற்றி அறிந்துகொள்ளவும், பிடித்தவற்றை இறக்கிக்கொள்ளவும் வசதியாக சுட்டிகளும், விவரங்களும் அதில் இருக்கும். மேலும், தேவைப்படும் செயலிகளுக்கு உறிய Crack-களும் இருக்கும். இதுவரை நான் வாங்கியுள்ள தட்டுகளில் ஒன்றுகூட மாறி இருந்ததில்லை. அனைத்திலும் ஒரு நேர்த்தி, அழகு. உலகின் பல இடங்களில் இப்படிப்பட்ட கொள்ளை செய்யப்பட்ட மென்பொருள் தட்டுக்கள் கிடைத்தாலும், இங்கு கிடைக்கும் தட்டுக்கள் போல நான் கண்டதில்லை.


'Pirates' பீ.ஸி-விளையாட்டின் தட்டு மற்றும் உறை

ரஷ்ய அரசியல் சட்டத்தில் இந்த திருட்டுக்களை ஒழிக்க பலமான விதிமுறைகள் இன்னமும் வரவில்லை என்பதே இவர்கள் இன்று தழைப்பதற்கு காரணம். சில வாரங்களுக்கு முன் AllOfMP3.com என்ற ரஷ்ய இணையதளத்தை, International Federation of the Phonographic Industry (IFPI)-இன் உந்துதலின் பேரில் கோர்ட்டுக்கு இழுத்தது ரஷ்ய போலிஸ். காரணம், அவர்களது தளத்தில் உலகின் பல மூலைகளில் இருந்தும் வெளியாக இசை ஆல்பங்களை போதிய பதிப்புரிமை இல்லாமல் MP3 வடிவில் விற்கிறார்கள் என்பதே. அதுவும் எப்படி, ஒரு பாட்டுக்கு இவ்வளவு விலை என்றில்லை. 5$-க்கு 500 பாடல்கள் என்ற கணக்கில். எதிர்பார்த்தார் போல், வெளிநாடுகளிலிருந்தும் அவர்களுக்கு வாடிக்கையாளர்கள் வந்து குவிந்தவண்ணம் உள்ளனர். வழக்கை விசாரித்த நீதிபதிகள், அந்த இணையதளத்திற்கு ஆதரவாக தீர்ப்பளித்துவிட்டார்கள். எப்படி? ரஷ்ய சட்டத்தில் எந்த ஒரு படைப்பை விற்கவும் Copyright மிக அவசியம் என்றுதான் உள்ளது. ஆனால், online distribution பற்றி ஒரு வரி கூட இல்லை. இவர்களது சட்டம், அனுமதி மீறியதாக சொல்லப்படும் பொருள் Material Goods அதாவது Physical copiesஆக இருக்கவேண்டும். இந்த இணையதளமோ, பாடல்களை MP3 வடிவில்தானே(electronic-ஆக) விற்கிறது. ஆக, அவர்கள் மீது கிரிமினல் குற்றத்தை பாய்ச்ச முடியாது என்று கூறிவிட்டார்கள். இதன் மூலம், ரஷ்ய சட்டத்தில் பதிப்புரிமைக்கு எந்த அளவுக்கு பாதுகாப்பு இருக்கிறது என்று புரியும்.

ஆனால், சென்ற ஆண்டுவரை நகரத்தின் எல்லா இடங்களிலும் நடைபாதைகளில் விற்றுவந்தவர்களை, மாஸ்கோ மாநகராட்சியே ஒரு பெரிய கட்டிடத்தை கட்டிக்கொடுத்து அதற்குள் கொண்டுசென்றுவிட்டார்கள். விற்பனையை தடை செய்தபாடில்லை. இந்தியாவில் NASSCOM போன்ற அமைப்புகள், தொழில் நிறுவனங்கள் கண்டிப்பாக அசல் செயலிகளைத்தான் வாங்க வேண்டும் என்று கடிவாளம் போடுகிறார்கள். ஆனால், இங்கு அப்படியும் இல்லை. பல அலுவலகங்களிலேயே திருட்டு செயலிகள்தான் பயன்படுத்தப்படுகின்றன.


சான் பென் நடித்த 21 Grams/Mystic River - இரண்டு படங்களை உள்ளடக்கிய டிவிடி

இன்று, கனிணியைத்தாண்டி, இந்த தொழில் DVDகளுக்கும் வந்துவிட்டது. புதிய ஹாலிவுட் படத்தின் DVD வெறும் 80 ரூபிள்தான். இவைகளும் மென்பொருள் தட்டுக்களைப்போல, ஒரு தட்டில் இரண்டு படங்கள் (நடிகர் அல்லது genre வகையில் பிரித்து) அதே 80 ரூபிளுக்கு, சுத்தமான அசல் டால்பி/டீ.டி.எஸ் 5.1 சப்தங்களோடு கிடைக்கின்றன. அப்படி டீ.டி.எஸ் லாம் உங்களுக்கு முக்கியமில்லையெனில் ஒரு தகடில் பத்துபடங்கள் வரை ஸ்டீரியோ ஒலியுடன் வைத்துள்ளார்கள். முக்கியமாக, சான்க்ட் பீட்டர்புர்க் மாநகரத்தில், DVD கடைகள் ஏராளம். இந்த விஷயங்களுக்கிடையில் ஒரு வேடிக்கை என்னவென்றால், இந்த திருட்டு பொருட்களை தயாரிக்கும் நிறுவனங்கள், தங்களுடைய பெயரையோ, விலாசத்தையோ, வெளியிட சிறிதுகூட யோசிப்பதில்லை. ஒவ்வொரு தட்டிலும், அதை தயாரித்த நிறுவனத்தின் பெயர், அதன் முழு விலாசத்துடன் பின் பக்கத்தில் இருக்கும். படங்களை உற்று கவணியுங்கள், ஒவ்வொன்றிலும், ஏதோ அசல் தயாரிப்பு போல Bar-Code கூட இருப்பதைக் காணலாம். சிலர் ஒருபடி மேலே போய், அவர்களது வெளியிடும், வெளியிடப்போகும் தயாரிப்புகளைப் பற்றி அறிந்துகொள்ள இணையதளங்களையே நடத்திவருகிறார்கள். 'செய்வதை திருந்தச் செய்' என்ற முதுமொழியை தவறாமல் பின்பற்றுபவர்கள் இவர்கள்.

shop505 - சான்க்ட் பீட்டர்புர்கில் உள்ள ஒரு புகழ்பெற்ற திருட்டு படைப்புகளை விற்கும் '505' நிறுவனத்தின் தளம். இங்கு அவர்கள் கடைகளின் விவரங்கள், புதிய படைப்புகளின் விமர்சனங்கள், தகவல்களைக் காணலாம். ரஷ்ய-னில்தான் உள்ளது. கொஞ்சம் scroll பண்ணி பாருங்கள்.


----------------
பி.கு: பழைய நண்பரிடம் பழையபடியே சுட்டது.

ரஷ்யா - பிரிட்டன் சர்ச்சை

என்னதான் நட்பு பாராட்டிக்கொண்டாலும், உளவுத்துறையை பயன்படுத்தாத நாடுகளே இருக்கமுடியாது. ஏன், கணவன் மனைவி போல் கூடிக்குலாவும் அமெரிக்காவும் பிரிட்டனுமே லண்டனிலும் வாஷிங்டனிலும் என்ன நடக்கிறது, நடக்கும் என்று உளவறியாமல் இருப்பதில்லை. ஒவ்வொரு வெளிநாட்டு தூதரகத்திலும் அந்நாட்டின் சர்வதேச உளவுத்துறையின் அலுவலகம் கண்டிப்பாக இருக்கும். ஆனால் இவர்கள் பெரும்பாலும் வெளிப்படையாக இயங்குவார்கள். இவர்களின் நடவடிக்கையும் தூதரகம் இருக்கும் நாட்டின் உளவுத்துறைக்கு தெரிந்தே நடக்கும். அநேகமாக இருபத்திநான்கு மணி நேரமும் இவர்கள் பின் தொடரப்படுவார்கள். இவர்களின் வாழ்க்கை வரலாறே உள்நாட்டுத்துறையிடம் இருக்கும். சரி, இப்படி தொடர்ந்து பின்தொடரப்படுவதால் அவர்கள் செய்வதற்கு பெரிதாக ஒன்றுமிருக்காது. அநேகமாக Co-ordinators, background planning, recon என்றே திரையின் பின் இருப்பர்.

அடுத்தவகை, டிப்ளமாட்கள் அல்லது பிரதிநிதிகள். இவர்களுக்கு உளவுத்துறையினரைக் காட்டிலும் நிறையவே சுதந்திரம் உண்டு. அதனால் பல நாடுகள் அடுத்த நாடுகளில் intelligence சேகரிக்க இவர்களை உளவாளிகளாக பயன்படுத்துவது காலந்தொட்டு நடந்துவருகிறது. Press Attache என்கிற மாதிரி போலிப்பதவிகளில் இருந்துகொண்டு உளவு வேலையும் செய்வது. சரி, எதுக்கு இவ்வளவு நீண்ட முன்னுரை என்றால் இப்படி செய்து வந்த பிரிட்டனின் பிரதிநிதிகள் நாலுபேர் ரஷ்ய உளவுத்துறையால் கையுங்களவுமாக பிடிபட்டிருக்கிறார்கள்.

Federal Security Bureau என்றழைக்கப்படும் ரஷ்யாவின் முக்கிய உளவு நிறுவனம் சாட்டியுள்ள குற்றம்: பிரிட்டனின் மாஸ்கோ தூதரகத்தில் அரசியல் பிரதிநிதிகள் நான்கு பேர் ரஷ்யர்களை agentகளாக மாற்றி அவர்கள் மூலம் தன்னார்வத் தொண்டு நிறுவனங்களுக்கும் குறிப்பாக மனித உரிமை சார்ந்தவற்றிற்கும் இன்னபிற அரசு சாராத சமூக நிறுவனங்களுக்கும், அரசுக்கு எதிராய் புரட்சியைத் தூண்டநினைக்கும் நிறுவனங்களுக்கும் சட்டவிரோதமாக நிதியளித்துள்ளனர். 'மாஸ்கோ-ஹெல்சின்கி' என்னும் அரசு எதிர்ப்பு மற்றும் மனித உரிமை ஆகியவற்றை வலியுறுத்தும் குழுவுக்கு மட்டும் கடந்த அக்டோபரில் நாற்பத்தியோராயிரம் அமெரிக்க டாலர்களை சட்டத்துக்குப் புறம்பான முறையில் பிரிட்டன் அளித்துள்ளதற்கு சாட்சியாய் ஆவணங்கள் கிட்டியுள்ளன் என்று FSB கூறியிருக்கிறது. இதுபோல இன்னும் பன்னிரண்டு முக்கிய குழுக்களும் இதில் சம்பந்தப்பட்டிருப்பதற்கும் முக்கியமான ஆவணங்களும் கையில் மாட்டியிருப்பதாகவும் சொல்லியிருக்கிறது. இதனை பிரிட்டனின் வெளியுறவுத்துறை அமைச்சகம் மறுத்தாலும், மாஸ்கோ தூதரகம் அவ்வளவு காரமாக ஒன்றும் பதிலளிக்காமல் இருப்பதை வைத்தே இதில் உண்மையிருக்கக்கூடும் என்று நினைக்க தோன்றுகிறது. ஆனால், சம்பந்தப்பட்ட மாஸ்கோ-ஹெல்சின்கியின் தலைவி ல்யுட்மிலா அலெக்ஸியேவா இது போலி ஆவணம் என்றும் சோவியத் கால அடக்குமுறைகளை பூடினின் சர்வாதிகார அரசு வெட்கமில்லாமல் கையாள்கிறதென்றும் காட்டமாக மறுப்பு அறிவிக்கை விட்டுள்ளார்.

மேலும் சாதாரண கல் போல் தோற்றமளிக்கும் ஒன்றை மாஸ்கோவின் முக்கிய சதுக்கங்களில் ஒன்றில் வைத்து அதன் மூலம் உளவுத்தகவல்கள் பரிமாறப்பட்டுவந்துள்ளதும் கண்டுபிடிக்கப்பட்டிருக்கிறது. ஒரு கால்பந்தின் அளவுக்கு இருக்கும் இந்தக் கல்லின் மதிப்பு பல மில்லியன்கள் இருக்குமென்று FSB நம்புகிறது. இம்மாதிரி இரண்டு மாஸ்கோவில் பிரிட்டனால் இயக்கப்பட்டு, ஒரு கல் மட்டும் எக்காரணத்தாலோ அப்புறப் படுத்தப்பட்டது என்றும் கூறுகிறது. அடுக்குமாடிக்கட்டிடத்தின் ஒன்பதாவது மாடியிலிருந்து கீழே வீசியெறிந்தாலும் உடையாத அளவுக்கு திடமும், பலமணி நேரங்கள் தண்ணீரிலும், குளிரிலும் நம்பகமாக சேவைசெய்யக்கூடிய திறனும் பெற்றிருக்கிறது என்கிறார்கள். மேலும் Wireless (WiFi) இணைப்பின் மூலம், செய்திகளை இருபுறமும் பரிமாறிக்கொள்ளமுடியும். அவ்வாறு வயர்லெஸ் இணைப்பில் பிரிட்டனின் பிரதிநிதிகள் தகவல்களை இறக்கிக்கொண்டிருந்தபோது, மறைந்திருந்த வீடியோவில் பதிவு செய்யப்பட்டு கையுங்களவுமாக பிடிக்கப்பட்டார்கள் என்று FSB சொல்கிறது. இவர்களுக்கு Diplomatic Immunity இருப்பதால் கைதுசெய்ய முடியாது. வெளியேற்றத்தான் முடியும். அப்படி வெளியேற்றினால் கூடியவிரைவிலேயே பிரிட்டனும் தன் பங்குக்கு சில ரஷ்ய பிரதிநிதிகளை வெளியேற்றும். ஆனால் சமயோசிதமாகவும் கிண்டலுமாக பூடின் விட்ட அறிக்கையில் "இவர்களை ரஷ்யா வெளியேற்றாது. அப்படி வெளியேற்றினாலும், புதிதாக இன்னும் திறமைவாய்ந்த உளவாளிகளைத்தான் மாற்றாக பிரிட்டன் அனுப்பும். அதற்கு இத்தகைய கையாலாகாத உளவாளிகளே இருப்பது நலம்" என்று சொல்லியிருக்கிறார். இப்போது பிரிட்டனுக்கு தர்மசங்கடம். அவர்களாகவே திரும்பப் பெற்றுக்கொள்ளவேண்டும். அதே சமயத்தில் போட்டிக்காக ரஷ்ய பிரதிநிதிகளை வெளியேற்றவும் முடியாது.

சர்வதேச அளவில் நட்புநாடுகளுக்குள்ளேயே இந்த மாதிரி சண்டைகள் நடப்பது வழக்கம் தான் என்றாலும் இது ஏன் முக்கியத்துவம் பெருகிறது? இந்த சர்ச்சையில் சம்பந்தப்பட்டிருக்கும் தன்னார்வக் குழுக்கள் தான் காரணம். இவற்றில் பல மனித உரிமை மீறல், சர்வாதிகார ஆட்சி என்று அதிபர் பூட்டினை தீவிரமாக எதிர்த்துவருகின்றன. அவற்றிற்கு நிதி பெருமளவில் அளித்துவருவது மேற்கத்திய நாடுகள் தான். ரஷ்ய சமூகத்தில் குழப்பத்தை ஏற்படுத்தவதே இக்குழுக்களின் முக்கிய நோக்கம் என்று அரசு குற்றஞ்சாட்டிவந்தது. இதனை தடுக்கவேண்டியே சர்ச்சைக்குரிய ஒரு சட்டத்தை ரஷ்ய பாராளுமன்றம் சில வாரங்களுக்கு முன் இயற்றியது. அச்சட்டத்தின் படி, வெளிநாட்டிலிருந்து வரும் நிதியில் பெரும் கெடுபிடிக்களை ஏற்படுத்தி அதன்மூலம் என்.ஜி.ஓ க்களின் பணவரவை பெருமளவில் தடுக்கமுடியும். ஐரோப்பிய ஒன்றியம் இச்சட்டத்திற்கு எதிர்ப்பு தெரிவித்தது. இந்த நேரத்தில் இப்பிரச்சனை லட்டுவாக பூடினுக்கு வந்துள்ளது. பொதுமக்களிற்கு என்.ஜி.ஓக்கள் மேல் இருந்து வந்த கொஞ்ச நஞ்ச ஆதரவையும் ஒரே கல்லில் அடித்தாகிவிட்டது. இப்போது மக்கள் என்.ஜி.ஓக்கள் மேல் விதிக்கப்பட்ட கட்டுப்பாடுகள் நியாயமானவையே என்று எண்ணத் தொடங்கிவிட்டனர். பூடினிற்கு இன்னுமொரு தலைவலி குறைந்தது.

ஏன் புடினுக்கு இந்த என்.ஜி.ஓக்களை பார்த்து இவ்வளவு பயம்? காரணம் இவைகளே லாதிவியா, ஜியார்ஜியா போன்ற முன்னாள் ரஷ்ய விசிலடிச்சான்நாடுகள் மேற்கு பக்கம் சாயக் காரணம் சமூகப்புரட்சியென்ற பெயரில். மேலும் ஏன் குறிப்பாக பிரிட்டன் குறிவைக்கப்பட்டது? இரு காரணங்கள். ஒன்று க்ரெம்ளினுக்கு எதிராய்ச் செயல்பட்டு நாட்டைவிட்டு ஓடிய ரஷ்ய அகதிகள் பிரிட்டனில்தான் இருக்கின்றனர். இவர்களை ரஷ்யா தன் கட்டுக்குள் கொண்டுவர பிரிட்டனின் சட்டம் தடையாக இருக்கிறது. நேற்று கூட போரிஸ் பெரஸோவ்ஸ்கி என்னும் முன்னாள் oligarch (கோடர்க்கோவ்ஸ்கி வருமுன்னே இவரே முதன்மையான பணக்காரர். இப்போது க்ரெம்ளினுக்கு பயந்து லண்டன் வாசம்) ரஷ்யாவில் பூடினை எதிர்த்து coup நடத்த திட்டமிட்டிருப்பதாகவும், அதற்காக தன் அத்தனை சொத்துகளையும் இழக்கவும் தயாரென்றும் நம்ம சு.சுவாமி மாதிரி ஒரு அறிக்கை விட்டிருக்கிறார்.

இரண்டாவது இன்னும் முக்கியமானது. உலகிலேயே அதிக அளவில் வெளிநாட்டுத் தொண்டு நிறுவனங்களுக்கு நிதி வழங்குவது அமெரிக்கா. அதன் பயனாலேயே கிழக்கு ஐரோப்பாவில் நன்றாக கால்பதித்துள்ளது. அமெரிக்காவை நேரடியாக தாக்க முடியாது. அதனால், அதன் உயிர் நண்பனான பிரிட்டன் குறிவைக்கப்பட்டுள்ளது. இதன்மூலம், ரஷ்யாவில் விளையாடுவதை நிறுத்திக்கொள்ளுமாறு அமெரிக்காவிற்குத்தான் மறைமுக எச்சரிக்கை விட்டுள்ளார் பூடின். ஆனால், நேரந்தான் சரியில்லை. உகரைனுடனான சண்டைக்கான அதிருப்தியே இன்னும் அடங்காதபோது, இது தேவையற்ற சர்ச்சை. முக்கியமாக ரஷ்யா ஜி-8 தலைமையேற்கும் தருணத்தில்.

BBC

Gazprom: 3

விவரமாக பதிவிடுகிறேன் என்று சொல்லிவிட்டு சோம்பல்பட்டு விட்டுவிட்டேன். இப்போது மழை காத்துக்கொண்டிருக்கிறேன் என்று பின்னூட்டம் இட்டவுடன், மழை இடியுடன் கூடிய புயலாய் மாறுவதற்குமுன் இதோ பதிவிட்டுவிடுகிறேன். :)

ரஷ்யா தன் மொத்த எரிவாயு ஏற்றுமதியில் எண்பது சதவிகிதம் வரை உக்ரைனின் குழாய்களையே நம்பியிருக்கிறது. மிக முக்கியமாக ஐரோப்பாவிற்கு ஏற்றுமதி செய்யப்படும் எரிவாயு. இதில் உக்ரைனுக்கு நிறுத்திவிட்டால் ஐரோப்பாவிற்கும் போகாதே என்று ஷ்ரேயா கேட்டிருந்தார். எண்ணெய், எரிவாயு, தண்ணீர், மின்சாரம் போன்றவற்றிற்கு குழாயை மூடுவது என்றால், நேரடிப் பொருள் கொள்ள முடியாது. உதாரணத்திற்கு ஆயிரம் க்யூபிக் மீட்டர் எரிவாயு ரஷ்யாவிலிருந்து அனுப்பப்படுகின்றது என்றால், அதில் 750 ஐரோப்பாவிற்கும், 250 உக்ரைனுக்கும் என்று வைத்துக்கொள்வோம். இதில், குழாயை மூடியது என்றால், 750 மட்டுமே ஜெர்மனிக்கென்று உக்ரைனின் குழாய்கள் வழியே ரஷ்யாவால் அனுப்பப்படும். இந்த 750-க்யூ.மீ பணம் கொடுத்து வாங்கி இருப்பது ஜெர்மனி. இப்போது இந்த 750-இருந்து உக்ரைன் தன் பங்கை எடுத்துக்கொள்ளுமானால் அது ஜெர்மனி மற்றும் ரஷ்யாவைப் பொருத்தவரை திருட்டு. சர்வதேச அளவில் ஒரு நாட்டிற்கு இந்த மாதிரி திருட்டை செய்ய தைரியம் வராது. தனியாக, இதுவரை இருபத்தியைந்து பில்லியன் டாலர்கள் அளவிற்கு உக்ரைன் ஏற்கனவே எரிவாயு திருடியிருப்பதாக காஸ்ப்ரோம் குற்றம் சாட்டியுள்ளது. அதை உக்ரைன் வன்மையாக மறுத்துள்ளது. ஜெர்மனி புத்தாண்டு தினத்தன்று தனக்கு வரவேண்டிய அளவிற்கு எரிவாயு வந்து சேரவில்லை என்று புகார் செய்தது. ரஷ்யா தான் உண்டான அளவு அனுப்பிவிட்டதாக சொல்லி, உக்ரைனில் தான் காணாமல் போயிருக்கவேண்டும் என்றும் சொல்லிவிட்டது. இந்த மாதிரி புகார்கள் வந்தால் அது நாட்டின் integrity ஐ பெருமளவில் பாதிக்கும்.

அடுத்து, செவாஸ்தபோலில் உள்ள ரஷ்யாவின் கடற்படை. சோ.யூ காலத்திலிருந்து தொடர்ந்து வரும் வழக்கம். உதாரணத்திற்கு, விண்வெளி ஆராய்ச்சியில் முன்னணி வகித்தாலும் ரஷ்யா தன் செயற்கைக்கோள்களை அனுப்ப இன்றுவரை கஸக்ஸ்தானில் இருக்கும் பைக்கானூரைத்தான் பயன்படுத்திவருகிறது. சர்வதேச விண்வெளி ஆராய்ச்சி நிலையத்திற்கு அனுப்படும் கோள்கள் போன்றவை கூட பைக்கானூரிலிருந்துதான் பறக்கின்றன. சோ.யூ பிரிந்த பிறகு, பைக்கானூருக்கென்று பணமாகவோ, பொருளாகவோ, சேவைகளாகவோ வாடகையொன்று கொடுக்கப்பட்டுவருகிறது. அதுவே தான் உக்ரைனின் செவாஸ்தபோல் நகரில் இருக்கும் கடற்படைக்கும். இதன் வாடகையை ஏற்றுகிறேன் என்று உக்ரைன் சீறியது தேவையின்றி பிரச்சனையை பெரிதாக்க உதவியதே தவிர பயனொன்றுமில்லை.

சரி, ஏன் உக்ரைன் மட்டும் குறிவைக்கப்படுகிறது என்றால் அதற்கு காரணம் முன்பே கூறியபடி சென்ற நாடாளுமன்றத்தேர்தல் தான். முன்னாள் அதிபர் லியோனிட் குச்மா ரஷ்யாவிற்கு மிகவும் நெருக்கமாக இருந்தார். அவரின் பதவிக்காலம் முடிந்தபின் நடந்த தேர்தலில் ரஷ்யா யனுகோவிச் என்ற ரஷ்ய சார்பு வேட்பாளரை ஆதரித்தது. ஆனால் அமெரிக்காவும், ஐரோப்பாவும் விளையாடியதில் "ஆரஞ்சு புரட்சி" என்று ஒன்று நடந்து மேற்குநாடுகளுக்கு நேசமான யூஷென்கோ தேர்ந்தெடுக்கப்பட்டார். இது அந்த சமயத்தில் பெரும் பரபரப்பையும் ரஷ்யாவிற்கு குறிப்பாக அதிபர் பூடினுக்கு அவமானத்தைத் தேடித்தந்தது. இதே மாதிரி ஜியார்ஜியாவிலோ, லாத்வியாவிலோ நடந்திருந்தால் ரஷ்யா பெரிதாக அலட்டிக்கொண்டிருக்காது. ஏனென்றால் ரஷ்யாவிற்கு உக்ரைனுக்கும் இருக்கும் உறவு அத்தகையது. ரஷ்யன் மட்டுமே பேசும் மக்களும் கணிசமான அளவில் உள்ளனர்.

உக்ரைனுக்கு என்று பெரிய வரலாறு ஒன்றுமில்லாவிட்டாலும், சோ.யூ வில் உக்ரைனின் தலைநகரமான "கியவ்"விற்கு தனி மரியாதை அளிக்கப்பட்டிருந்தது. Kyiv is the mother of all cities என்று ஒவ்வொரு ரஷ்யனும் பள்ளிக்கூடத்தில் படித்தனர். கலாச்சாரம், மதம் போன்ற விஷயங்களில் மிகுந்த ஒற்றுமை இருந்தது இரு மக்களுக்கும். குச்மாவின் ஆட்சியில் அதிருப்தியடைந்த மக்கள் அமெரிக்க சார்பு யூஷென்கோவை தேர்ந்தெடுத்ததும் வேண்டுமென்றே தன்னை அவமதிப்பு செய்கின்றது உக்ரைன் என்று ரஷ்யா கருதத்தொடங்கியது. கருவிக்கொண்டே இருந்த போது லட்டுவாய் அமைந்தது காஸ்ப்ரோம் விவகாரம். மேலும், யூஷென்கோ பதவிக்கு வந்து கொடுத்த வாக்குறுதிகள் எதுவும் நிறைவேற சாத்தியக்கூறுகள் இருப்பதாய் தெரியாமல் உக்ரைனியர்கள் குழம்பிக்கொண்டிருக்கின்றனர். இந்த சமயத்தில், உக்ரைனின் (யூஷென்கோ) எதேச்சாதிகார மேற்கத்திய சார்பு நிலையால் நட்பு நாடான ரஷ்யாவை பகைத்துக்கொண்டால், எரிவாயு தட்டுபாடு அதன் மூலம் பொருளாதார முடக்கம் என்று விளைவுகள் ஏற்படும் என்று அச்சுறுத்த கிடைத்த நல்ல வாய்ப்பொன்றை ரஷ்யா நன்றாகவே பயன்படுத்திக்கொண்டது. இத்தனை காலம் கிடைத்துவந்த மலிவுவிலை எரிவாயுவால் inefficient ஆக இருந்த உக்ரைனிய கம்பெனிகள் பதறத்தொடங்கின. பொருளாதாரம் கொஞ்சம் ஆட்டம் கண்டது. யூஷென்கோவின் மேலும் அதிருப்தி வளரத்தொடங்கியிருக்கிறது. அதனால் தான், சென்ற பதிவில் இப்பிரச்சனை அதிக நாள் நீடிக்காது என்று எழுதியிருந்தேன். நீடித்திருந்தால் ரஷ்யாவிற்கு லாபமே கிட்டியிருக்கும், யூஷென்கோ மேல் ஏற்படும் அதிருப்தியால்.

குட்டி செய்தி: இந்த விளையாட்டில் ஒரு இந்தியரும் சம்பந்தப்பட்டுள்ளார். வேறு யாருமில்லை. உலகின் மூன்றாம் பெரும்பணக்காரரான லக்ஷ்மி மிட்டல் தான். இரண்டு பில்லியன் மதிப்புள்ள உக்ரைனின் மிகப்பெரிய இரும்பு ஆலையை ஐந்து பில்லியனுக்கு (இதுவே உக்ரைனின் சுதந்திர வரலாற்றிலேயே மிகப்பெரும் தனி முதலீடாகும்) அவர் வாங்கியதற்கு முக்கிய காரணமே ரஷ்யாவில் இருந்து வந்த மலிவுவிலை எரிவாயுதான். இந்தப் பிரச்சனையால் இப்போது எரிவாயுவிலிருந்து கரிக்கு மாறப்போவதாய் அறிவித்திருக்கிறது அவரின் நிறுவனம்.

சரி, அரசியல் போதும். இப்போது கொஞ்சம் கண்ணாமூச்சி விளையாட்டு பார்ப்போமா? இந்த விவகாரம் சென்ற வாரம் ரஷ்யாவிற்கு சாதகமாய் முடிவுக்கு வந்திருக்கிறது. அதாவது ரஷ்யா கேட்ட 230$ கொடுக்க ஒப்புக்கொண்டுள்ளது. ஆனால் ஒப்புக்கொண்டது உக்ரைன் அல்ல. நடுவில் இருக்கும் ஒரு மர்ம நிறுவனம். குச்மா ஆட்சிக்காலத்தில் ஸ்விட்ஸர்லாந்தில் பதிவு செய்யப்பட்டிருக்கும் RosUkrEnergo என்ற இந்த நிறுவனத்தில் ரஷ்யா முதலீட்டாளர்களும், பெயர் தெரியாத உக்ரைனிய பெருந்தலைகளும் சம்பந்தப்பட்டுள்ளனர். இப்போது போட்டுள்ள ஒப்பந்தந்தின் படி, ரஷ்யாவிடமிருந்து 230$ RUE வாங்கி வெறும் 96$ உக்ரைனுக்கு விற்கும் என்று அறிவிக்கப்பட்டுள்ளது. அதெப்படி கட்டுபடியாகும் என்ற கேள்விக்கு, டுர்க்மெனிஸ்தானிலிருந்து மலிவுவிலை எரிவாயு வாங்கி சரிபாதி கலந்து விற்றால் லாபமே என்று RUE கருதுகிறது. இதில் கேள்வியென்னவென்றல் இத்தகைய ஒரு shady deal-இல் சம்பந்தப்பட்டுள்ளவர்கள் யாரென்று வெளிப்படையாக தெரியாததுதான். இருப்பினும் காஸ்ப்ரோம், பூடின், யூஷென்கோ மற்றும் மேற்கத்திய நாடுகள் எல்லாம் இந்த ஒப்பந்தத்தை வரவேற்றுள்ளன. மேலும் காஸ்ப்ரோம், குழாய்களை பயன்படுத்த ஆயிரம் க்யூ.மீ 1.06$ என்ற விலையை 1.90 என்று இனிமேல் உக்ரைனுக்கு அளிக்கும் என்றும் அறிவித்துள்ளது.

ரஷ்யா இதில் அரசியல் இல்லை பொருளாதாரமே பிரச்சனைக்கு காரணம் என்றாலும் அடிப்படையில் நட்பு நாடுகளுக்கு மலிவு விலை எரிவாயு தனக்கு நஷ்டம் ஏற்பட்டாலும் அளித்துவந்தது. ஆனால், தற்போதைய நிலையில் தனக்கு எதிரான அரசு ஆளும் ஒரு நாட்டிற்கு எதற்கு தன் மக்களின் வரிப்பணத்தில் மலிவுவிலையில் வழங்கவேண்டும் என்பதுதான். அது நியாயமானதும்கூட. ஆனால், இப்பிரச்சனையால் கலங்கிப்போயிருப்பது ஐரோப்பாவும் தான். தங்கள் எரிவாயுத் தேவையின் 30 சதவிகிதம் வரை பூர்த்தி செய்வது ரஷ்யா தான். இதே மாதிரி விளையாட்டை தங்களிடமும் விளையாண்டால் என்ன நிலை உண்டாகும் என்று கவலைப்படத்துவங்கியுள்ளனர் ஐரோப்பாவின் பெருந்தலைகள். இதனால் alternate energy பக்கம் ஆர்வம் வளரலாம். மேலும் எகிப்து போன்ற நாடுகளை தங்கள் எரிவாயு தேவைகளுக்கு இன்னும் அதிகமாக பயன்படுத்தத் தொடங்கலாம்.

இந்தப் பிரச்சனை மூலம் ரஷ்யாவை புறக்கணிப்பார்களா என்றால் இல்லையென்றே தோன்றுகிறது. ஏனெனில் மாற்று சோர்ஸ்களை உருவாக்க பலவாண்டுகள் பிடிக்கும். பணமும், நேரமும் ஏராளமான அளவில் செலவிடவேண்டும். மேலும் எகிப்து போன்ற நாடுகளின் அரசியல் நிலையும் அவ்வளவு சாதமாக இல்லை. அதற்கு பதில், கொஞ்சம் விட்டுப்பிடித்தால் ரஷ்யாவை stable partner ஆக்க முடியும். அதைத்தான் செய்ய முற்படும் ஐ.யூனியன். அதனாலேயே உக்ரைன் பணிந்துபோனது. ஆனால், இந்த நேரத்திற்குள் இன்னும் ஒரு முறை கூட இந்த மாதிரி காஸ்ப்ரோம் விளையாடுமானால் ரஷ்யாவின் கனவான உலகின் energy superpower ஆவது வெறும் கனவாகவே ஆகிவிடும்.

முந்தைய பதிவுகள்

1, 2

Gazprom - 2

போன தடவை பிரச்சனை என்னன்னு பார்த்தோம். மேலோட்டமா வெறும் விலைவாசி சண்டைங்கற மாதிரி தெரிஞ்சாலும் இதுக்கு பின்னாடி இருக்கற அரசியலைக் கொஞ்சம் இங்கே பார்ப்போம்.

இதுக்கும் சோவியத் யூனியன்லேர்ந்துதான் ஆரம்பிக்கணும். சோவியத் யூனியன் இருந்தவரை அதன் துணைக்கோள்களான நாடுகளுக்கு மாஸ்கோ தான் எல்லா பிரச்சனைகளிலும் ultimate authority. ஆனால் சோ.யூ வீழ்ந்தபின் ரஷ்யா தன்னைத்தானே சோ.யூவின் ஏகோபத்திய வாரிசாக நினைத்து பிரிந்து சென்ற நாடுகளை CIS என்ற புதுப்பெயரில் ஒருங்கிணைத்து தன் கட்டுப்பாட்டிற்குள்ளேயே வைத்துக்கொள்ள விரும்பியது. ஆனால், மேற்கத்திய நிதி பெருமளவில் புனர்நிர்மாணத்திற்கு தேவைப்பட்டதால் பல கிழக்கு ஐரோப்பிய நாடுகள் மேற்கு பக்கம் சாயத்தொடங்கின.

ரஷ்யாவின் தயவு அவர்களுக்குத் தேவையாய் இருக்கவில்லை. மேலும், பல முன்னாள் சோவியத் நாடுகள் உதா: ஹங்கேரி, போலந்து, செக் ரிபப்ளிக் போன்றவை தங்களை proper ஐரோப்பியர்கள் என்றும், மாஸ்கோவின் சதியால் ஐரோப்பிய கூட்டமைப்பில் இத்தனை ஆண்டுகள் புறக்கணிக்கப்பட்டுவிட்டதாகவும் கருதத்தொடங்கின. எஸ்டோனியா, லாத்வியா, ஜியார்ஜியா போன்ற நாடுகளும் ஐரோப்பிய ஒன்றியத்தில் இணையத்துடித்தன. அதற்கு விலையாய் கிழக்கு ஐரோப்பிய நாடுகள் ரஷ்யாவுடனான தங்களின் நெருங்கிய படை மற்றும் பொருளாதாரத்தொடர்பை துண்டித்து, சோ.யூ ஜென்மப் பகையான நாட்டோவில் தங்களை இணைத்துக்கொள்ளவும் ஆரம்பித்தன.

இதில் ரஷ்யாவின் நிலைமை ஆற்றாமையே. சோ.யூவின் நேரடி வாரிசு என்று பிரகடனப்படுத்தியபின்னர், மேற்கோடு ஓவராக ஒட்டி உறவாட முடியாது. நிதிநிலைமை, படைபலம் எல்லாம் சீர்குலைந்து இருந்த முன்னாள் வல்லரசின் வாரிசுக்கு, வெந்தபுண்ணிலேயே வேலைப் பாய்ச்சுவதுபோல் முன்னாள் நட்புநாடுகள் பிரிந்துசென்றது ஆனது. அவர்களைத்தன் வழிக்குக் கொண்டுவர ஒரு ஆயுதம் கூட ரஷ்யாவின் கையில் இருக்கவில்லை என்பதே நிதர்சனமான உண்மை. ஆனால் அதை (அனைவருக்கும் தெரிந்திருந்தாலும்) பகிரங்கமாக ஒப்புக்கொள்வது சர்வதேச அளவில் மானப்பிரச்சனை. இந்த காலகட்டத்தில் வாய்மூடி மவுனியாய் வேடிக்கை மட்டுமே பார்க்கமுடிந்தது. இந்த நாடுகள் தன் கையை விட்டுப்போவதில் பொருளாதார இழப்பு பிரதானமானதில்லை. strategic காரணிகளே முக்கியமானவை.

க்யூபன் மிஸ்ஸைல் பிரச்சனையும் இதே போன்றதுதான். சோ.யூ மிஸ்ஸைல்களை தன் நாட்டில் அமைக்க அனுமதிப்பது க்யூபாவின் பிரத்தியேக உரிமை. ப்ரெஷ்னேவ் அமெரிக்காவை ஒருபோதும் தாக்க எண்ணவில்லை, மாறாக சர்வதேச அரங்கில் "பார்த்தாயா, உன் வீட்டு முற்றத்திலேயே என் ஆயுதங்களை குவித்திருக்கிறேன்" என்று அமெரிக்காவிற்கு அவமானத்தை உண்டாக்கவே செய்த முயற்சி அது. அதை தடுக்க நினைத்து வெற்றியும் பெற்ற அப்போதைய அமெரிக்க நிலைப்பாட்டிலேயே இப்போது ரஷ்யா இருக்கிறது. ஆனால் படைபலமும் பொருள்பலமும் இல்லாத நிலையில், அமெரிக்கா அன்று அவமானப்பட்டதைவிட இன்று பலமடங்கு அவமானப்பட்டிருக்கிறது. வல்லரசு நாடுகளுக்கென்று விசிலடிச்சான்குஞ்சு நாடுகள் எப்போதும் இருக்கும். அவை விட்டுப்போனதுதான் பிரச்சனையே. இந்த அவமானம் எப்படியெல்லாம் வடிவெடுக்கிறது என்பது சர்வதேச அளவில் ரஷ்யாவின் இன்றைய இமேஜை வைத்தே தெரிந்துகொள்ளலாம். லாத்வியா, ஜியார்ஜியா போன்ற 'பச்சா' நாடுகளெல்லாம் ரஷ்யா ஒரு பல்லிழந்த கிழப்புலி என்ற ரேஞ்சிற்கு மானத்தை வாங்கி ஐரோப்பிய அரசியல் செய்யும்போது முன்னாள் வல்லரசு என்ற வகையில் ஏற்படும் கோபமும், ஆற்றாமையும் புரிந்துகொள்ளக்கூடியவையே இல்லையா? படைபலம் குறைந்தது உண்மைதான். ஆனால் இன்றளவும் உலகத்தையே மொத்தமாக சிலபல முறைகள் அழிக்கவல்ல பலம் பொருந்திய நாடு, பொருளாதாரச் சீர்கேட்டில் சிக்கி இருப்பதால் குட்டி நாடுகள் எல்லாம் போங்கு செய்வதை எப்படி தடுக்கலாம் என்று விழிபிதுங்கிக் கொண்டிருக்கும்போது ஆபத்பாந்தவனாய் வந்திருக்கிறது காஸ்ப்ரோம்.

இப்போது உக்ரைன் இந்தப் பிரச்சனையில் சிக்கியிருப்பது மேற்சொன்ன அரசியலே காரணம். அதுவும் ரஷ்யா இவ்வளவு சர்வதேச பிரஷருக்கும் பின்னரும் விடாப்பிடியாக இருக்கிறதென்றால் அதற்கு மேற்கத்திய நாடுகள் உக்ரைனின் சென்ற தேசிய தேர்தலில் செய்த அரசியலே முழுமுதற்காரணம். அமெரிக்காவின் தயவில் நடத்தப்பட்ட 'ஆரஞ்சு புரட்சியே' இப்படியான கத்திமேல் நடப்பது போன்ற ஒருவிஷயத்தை இமேஜ் போனாலும் செய்வது என்று வரிந்துகட்டிக்கொண்டு ரஷ்யா செய்கிறது.


(தொடரும்)
ரொம்பவே நீட்டிமுழக்கி எழுதறேனோ? எனினும் ரொம்ப நாளா தொடர் போடாத குறையை இதுமூலமா தீர்த்துக்கொள்ளலாம்னு நினைக்கிறேன்.

ரஷ்யாவின் துருப்புச்சீட்டு: 1 - Gazprom

Gazprom என்பது ரஷ்ய அரசினால் (க்ரெம்ளின் தலைகளால் என்று படிக்கவும்) நடத்தப்படும் நிறுவனம். ரஷ்யாவின் மிகப்பெரியது என்பதுடன் உலகிலேயே இயற்கை எரிவாயுவில் முதலிடம் பெற்றுள்ள நிறுவனம். உலகின் 25 சதவிகித இயற்கை எரிவாயு கிணறுகளை தன்வசம் கொண்டுள்ளது. க்ரெம்ளினின் பல பெரும் தலைகள் காஸ்ப்ரோமின் மிகப்பெரிய முதலீட்டாளர்கள். அதனால் க்ரெம்ளினை எதிர்க்கும் எந்தக் குட்டி கம்பெனியையும் ஸ்வாஹாஹா பண்ண காஸ்ப்ரோமின் பணபலம் பயன்பட்டுவந்தது.

சிறந்த உதாரணம் தன் வியாபாரத்திற்கு சிறிதும் தொடர்பில்லாத NTV தொலைக்காட்சி ஐ அதன் எதிர்க்கட்சி சார்பிற்காக forceful ஆக க்ரெம்ளினின் ஆணையின்பேரில் கைப்பற்றியது சில வருடங்களுக்கு முன்னர் உலக அரங்கில் சர்ச்சையைக் கிளப்பியது. பயனொன்றும் தான் இல்லை. இன்றைக்கு NTV அரசின் புகழ்பாடும் பல்வேறு ஊடகங்களில் ஒன்றாகிவிட்டது.

சோவியத் யூனியன் காலத்திலிருந்து அதன் கட்டுப்பாட்டில் இருக்கும் நாடுகளுக்கு மிகக்குறைந்த விலையில் எரிவாயுவை விற்றுக்கொண்டிருந்தது காஸ்ப்ரோம். அந்த நாடுகளில் உக்ரைனும் அடக்கம். இப்போது புதிய பிரச்சனை வெடித்து காஸ்ப்ரோமின் பக்கமும் க்ரெம்ளின் ஆளுமையின் பக்கமும் சர்வதேச ஆர்வத்தை திருப்பியிருக்கிறது. பிரச்சனை இதுதான். இதுவரை ஆயிரம் சதுரமீட்டர் எரிவாயுவிற்கு ஐம்பது அமெரிக்க டாலர்கள் என்று இருந்த விலையை திடுமென இருநூற்றிமுப்பது அமெரிக்க டாலர்கள் என்று தடாலடியாக ஏற்றியிருக்கிறது. உலக எரிவாயு விலைகளுக்கு சமமாக விலை ஏற்ற வேண்டிய கட்டாயத்தில்தான் விலையுயர்த்தப்பட்டது என்பது காஸ்ப்ரோமின் கருத்து. இந்த விலையுயர்வும் பொதுவானதாய் இல்லாமல் நாடுகளுக்கு தக்கவாறு arbitraryஆக நிர்ணயிக்கப்பட்டுள்ளது. உதாரணத்திற்கு ஆர்மேனியா, ஜியார்ஜியா போன்ற நாடுகளுக்கு நூறிலிருந்து நூற்றைம்பது டாலர்கள் வரை விலைநிர்ணயம் செய்யப்பட்டுள்ளது. அதே சமயத்தில் மிகவும் நட்புநாடான பெலாரஸுக்கு நாற்பத்தியேழு டாலர்கள் என்ற தற்போதைய விலையிலேயே விற்கப்படும் என்று காஸ்ப்ரோம் அறிவித்துள்ளது. உக்ரைனுக்கு மட்டுமே அதிகபட்சமாக இருநூற்றிமுப்பது டாலர்கள். உக்ரைன் இந்த விலையை அளிக்கவேண்டும் இல்லை ஐரோப்பாவிற்கு உக்ரைன் வழியாகச் செல்லும் எரிவாயுக்குழாய்களில் பங்குகளோ அல்லது மொத்தமாகவோ உக்ரைன் காஸ்ப்ரோமிற்கு தருமானால் விலை மறுபரிசீலனை செய்யப்படும் என்றும் காஸ்ப்ரோம் கூறியிருக்கிறது. பெலாரஸுக்கு அளிக்கப்படும் சலுகைக்கு குழாய்கள் மீதான் உரிமையை அந்த நாடு விட்டுக்கொடுத்ததால் மலிவான விலையென்றும் சொல்லப்படுகிறது.

மேலும் உக்ரைன் இந்த விலையுயர்வுக்கு உடன்படாவிட்டால் ஜனவரி ஒன்றாம் தேதி காலை பத்துமணிக்கு உக்ரைனுக்கு அளிக்கப்படும் எரிவாயு நிறுத்தப்படும் என்று காஸ்ப்ரோம் அறிக்கைவிட்டது. அதன்பின்னர் இரண்டு புறங்களும் மாறி மாறி அறிக்கைகளில் அடித்துக்கொண்டனர். உக்ரைன் தன் பங்குக்கு Black Sea இல் இருக்கும் செவாஸ்தப்போல் என்னும் துறைமுகத்தில்தான் ரஷ்ய கடற்படையின் Southern Fleet இருக்கிறது. இதற்கான வாடகையை உயர்த்தும் எண்ணத்தில் உக்ரைன் இருப்பதாய் அறிக்கைவிட்டது. அதற்கு ரஷ்ய பாதுகாப்பு அமைச்சகம் கண்டனம் தெரிவித்தது. அதுவே மேலும், ஐரோப்பாவிற்கு காஸ்ப்ரோம் வழங்கும் எரிவாய் உக்ரைனின் குழாய்கள் வழியேதான் செல்கிறது. அவ்வாறு காஸ்ப்ரோம் அனுப்பும் எரிவாயுவில் பதினைந்து சதவிகிதம் வரை தனக்கென எடுத்துக்கொள்ள குழாய் உரிமையாளர் என்ற வகையில் உரிமை இருப்பதாக அறிவித்தது. அப்படி செய்வது திருட்டு என்று காஸ்ப்ரோம் பதிலறிக்கை விட்டது. மேலும் இந்தவகையில் உக்ரைன் திருடினால் Arbitration Institute of the Stockholm Chamber of Commerce க்கு இப்பிரச்சனையை எடுத்துச்செல்வதைத் தவிர தனக்கு வேறு வழியில்லையென்றும் எச்சரித்தது.

இதற்கு நடுவில் இதுவரை மௌனம் காத்துவந்த ரஷ்ய அதிபர் பூடின் நேற்று உக்ரைனுக்கு இந்த விலையேற்றத்தை சமாளிக்க ரஷ்யா மூன்றரை பில்லியன் டாலர்கள் வரை கடனாய் வழங்கத் தயாராக இருப்பதாய் அறிவித்தார். மேலும் பேச்சுவார்த்தையின் மூலம் தீர்க்கப்பட்டிருக்கவேண்டிய விஷயத்தை உலகச்சந்தியில் சிரிக்கவைத்துவிட்டதாய் இரண்டு தரப்புகளையும் கடிந்தும் கொண்டார். ஆனால் அவரின் கடன் தேவையில்லை என்று உக்ரைன் நிராகரித்துவிட்டது.

இந்த வருடத்திய குளிர்காலத்தை ஓட்டிவிடும் அளவிற்கு உக்ரைனிடம் கைவசம் எரிவாயு இருக்கிறதெனினும் காஸ்ப்ரோம் சொன்னவாறு எரிவாயுவை நிறுத்திவிட்டால் பிரச்சனை வராமலிருக்க, கவனமாய் உபயோகப்படுத்துமாறு பொதுமக்களிடம் வேண்டியிருக்கிறார் உக்ரைனிய அதிபர் யூஷென்கோ. பிரச்சனையின் குறியே அவர் தான் என்பதுதான் இதில் காமெடி. மிகவும் நீண்டுவிட்டதால் இதற்கு பின்னாலிருக்கும் அரசியலை அடுத்த பதிவில் பார்ப்போம்.

(தொடரும்)

பீட்டர்ஸ்பர்க் - சில புகைப்படங்கள்

1. பனியில் உறைந்திருக்கும் பூங்கா

2. Church of Spilt Blood - இதப்பத்தி ஏற்கனவே ஒரு பதிவு போட்டுருக்கேன் இங்க



3. Anichkov Bridge பார்த்தோமில்லியா. அது பக்கத்தில இருக்கற ஒரு கட்டிடத்தின் facade. டியோடரண்ட் நல்லா வேலை செய்யுதா இல்லியான்னு பாக்கறாங்க



4. Peter & Paul Fortress இல் இருக்கற சர்ச். இந்த அரண்மனை தான் முதல் முதலில் பீட்டர்ஸ்பர்க்கின் ஆதாரம். பீட்டர்ஸ்பர்க் பத்தின பழைய பதிவு இங்கே.



5. Vladimirskyi Cathedral - வீட்டுப் பக்கத்தில இருக்கற கதீட்ரல்.


நம்மூர் போட்டோ இல்லாமலியா.. நாள நாளன்னிக்கு போடறேன்.

Click on Images to view Full size

பனிவிழும் பொழுதில் - புகைப்படங்கள்

என்னோட 'வந்தாச்சு வந்தாச்சு' பதிவில் போட்டோ போட முடியல. அதனால போன வருஷம் எடுத்த சில படங்கள். எல்லாம் சான்க்ட் பீட்டர்புர்க்கில் எடுத்தது.

1. உறைந்து போன நேவா நதி. சில்ஹவுட்டில் வலமிருந்து இடம். ராஸ்டரெல்லி தூண், இசாக்கியெவ்ஸ்கி கதீட்ரல், அட்மிரால்ட்டி, ஹெர்மிடாஜ் அருங்காட்சியகம்.

2. Church of the Spilt Blood - பின்புறமுள்ள ஒரு பார்க்.



3. Peter and Paul Fortress அருகில் எடுத்தது. பாலத்துக்கு அந்தப் பக்கம் நான் இன்னும் போய்பாத்தில்லை!





4. Summer Garden அருகில் ஒரு canal.





5. Anichkov Palace - அருகில். இடது பக்கம் கொஞ்சமாத் வெள்ளை பில்டிங் தெரியுது இல்லையா? இந்த நதிக்கு பேர் fontanka. இந்தப் பாலத்தின் பெயர் அனிச்கவ் மோஸ்ட் (பாலம்). மிகவும் பிரபலமானது. முக்கிய சாலையான நெவ்ஸ்கி ப்ராஸ்பெக்டில் இருக்கிறது. இந்த பாலத்தில் இருக்கும் நான்கு சிலைகளும் - குதிரையை அடக்கும் வீரர்கள் - ரொம்ப பிரபலம். போட்டோ எடுக்காத டுரிஸ்ட்களே இல்லேன்னு சொல்லலாம்.

இ.பி 5: புதிய மன்னர்கள்

கோர்பசேவ் பதிவியை விட்டு இறங்கியாச்சு. வந்தாரு போரிஸ் யெல்ட்ஸின்னு போன பதிவுல பார்த்தோமா? அவர் கூட ஒரு கூட்டமும் வந்தது. நியோ லிபரல்ஸ்னு சொல்லிக்கொண்ட கூட்டம். அனாடோலி சுபாய்ஸ், யிகோர் ஹைதர், போரிஸ் நெம்ட்ஸோவ் இப்படி பலர். கம்யூனிஸ்டுகளுக்கு கிட்டத்தட்ட கட்டம் கட்டிய பின் எதிர்ப்பு என்பதே இல்லாமல் இருந்தது. இதில் முக்கியமானவர் யிகோர் ஹைதர். "அதிர்ச்சி வைத்தியம்" என்ற தத்துவத்தின் படி ரஷ்யாவின் சோவியத் பொருளாதாரத்தை சந்தைப் பொருளாதாரமாக மாற்ற வேண்டும் என்று நினைத்து அதன்படி அதிர்ச்சியும் கொடுத்தார்.

அதுவரையில் கட்டுப்பாடுக்குட்பட்டிருந்த பொருட்களின் விலைகள், தனியார்மயமாக்கத்தின் மேலிருந்த கெடுபிடிகள், நிறுவனங்களுக்கு அதுவரையில் கொடுக்கப்பட்டுவந்த சப்ஸிடிஸ் என எல்லாவற்றையுமே ஒரே நாளில் கட்டவிழ்க்கப்பட்டன. இதன் விளைவால் ஏற்பட்ட பணவீக்கத்தை "hyperinflation" என்று வருணித்தார்கள் என்றால் நீங்கள் நிலைமையில் தீவிரத்தை உணர முடியும். இதற்கு முக்கிய காரணம் ரஷ்யாவின் செண்ட்ரல் வங்கி என்றால் நம்புவதற்கு கடினமாக இருக்கிறதல்லவா? பொருளாதார மாற்றத்தை விரும்பாத வங்கி, ரூபிள்களை அச்சடிக்க ஆரம்பித்தது. ரூபிள் வெறும் பேப்பர் என்ற மதிப்பானது. ரூபிள்களில் ஊதியம் பெற்று வந்த சாமானிய ரஷ்யர்களின் நிலை மிகவும் பரிதாபகரமானது. ஆயிரக்கணக்கான ரூபிள்கள் சேமித்து வைத்திருக்கிறோம் என்று நினைத்தவர்களின் வாழ்க்கையளவிலும் சேர்த்த சேமிப்பு உப்புக்கு பெறாமல் ஆனது.

சோவியத் காலத்தில் கடைகளில் சில பொருட்களே கிடைத்தாலும், அவற்றை வாங்கும் சக்தி மக்களிடம் இருந்தது. ஆனால், சந்தைப் பொருளாதாரம் என்று வந்தபின் பொருட்கள் குவியத் தொடங்கின. வாங்கத்தான் ஆளில்லை. 1993-இல் 49 சதவிகித ரஷ்யர்கள் வறுமைக்கோட்டிற்கு கீழ் இருந்தனர் என்று கூட ஒரு புள்ளிவிவரம் உண்டு. பல தொழிற்நிறுவனங்கள் நிதி நெருக்கடியை சமாளிக்க முடியாமல் கதவை மூடின. மக்களும் வீதிக்கு வந்தனர்.

இந்த மாறுதல்களை எதிர்க்க ஆரம்பித்த மக்களையும், மற்றவர்களையும் அடக்குவதற்காக தன் கைப்பாவையான டூமாவின் (பாராளுமன்றம்) மூலமாய் சட்டமாய் இயற்றினார் யெல்ட்ஸின்.

1994-இல் இப்படி எல்லாப்புறத்திலிருந்தும் இடி வாங்கிக் கொண்டிருந்த ரஷ்யாவிற்கு வந்தது அடுத்த (இன்றளவும் தீராத) தலைவலி. செசன்யா. மிகவும் தெற்கிலுள்ள, அதிக இசுலாமியர்கள் உள்ள இந்த நாடு ரஷ்யாவிலிருந்து பிரிவதாய் சுதந்திர பிரகடனம் செய்தது. ஆனால், எண்ணெய் வளமிக்க அந்த ஏரியாவை விட்டுத்தர யெல்ட்ஸின் சம்மதிக்க வில்லை. படைகளை அனுப்பினார். ஆனால் morale இல்லாத படைகள் செசன்யர்களை கட்டுக்குள் வைக்க திண்டாடினர். ஒருவழியாய் பிப்ரவரி 95 இல் 25000 உயிரழப்புகளுக்கு செசன்யாவின் தலைநகர் கிராஸ்னியை கைப்பற்றினர். இது ஒரு புறம். வெளியுலகின் கவனமெல்லாம் இங்கே இருக்க, வரலாறு காணாத ஒரு நூதன மோசடி ரஷ்யாவினுள்ளே நடந்து கொண்டிருந்தது.

ரஷ்யாவையை விற்று ஏப்பம் விட்டுக்கொண்டிருந்தனர் யெல்ட்ஸினின் கூட்டாளிகளும் பார்ட்னர்களும். எனர்ஜி, தொலைதொடர்பு, யுடிலிட்டிஸ் ஆகியவற்றில் பல பிராந்திய, நாடு அளவிலான, தனி நகரங்களுக்கென பலநூற்றுக்கணக்கான நிறுவனங்கள் இருந்தது சோவியத் யூனியனில். ஆனால், இந்த சமயம் என்ன செய்தனர் தெரியுமா? அரசுக் கம்பெனியின் CEO கம்பெனியின் தனியான முதலாளியாவார். மற்ற முக்கியஸ்தர்களுக்கு அவ்வாறு தோற்றுவிக்கப்பட்ட தனியார் நிறுவனங்களில் கணிசமான பங்குகள் கொடுக்கப்படும். இப்படியாக அரசு நிறுவனம் தனியார் நிறுவனமாகும். வேடிக்கையாக இருக்கிறதல்லவா? ஆனால், யெல்ட்ஸின் ஆசியுடன் இதுதான் நடந்தது. பல பில்லியன் டாலர்கள் இந்த வகையில் அரசுத்தரப்பிலிருந்து தனியாருக்கு கைமாறின. சொந்தங்களுக்கு கொஞ்சம், மற்றவர்க்கு கொஞ்சம் என்று பெரிய ரஷ்ய ஆப்பத்தை பங்கு போட்டுக் கொடுத்தார் யெல்ட்ஸின். முக்கியமாய் 1996 அதிபர் தேர்தலில் தோல்வியடையும் நிலை வந்தபோது இந்த முதலாளிகளின் எண்ணிக்கை பல மடங்கு அதிகரித்தது. ஏனென்றால் தேர்தல் சமயத்தில், சம்பள பாக்கி குறித்த போராட்டங்கள் வெடிக்காமல் வேலை செய்தவர்கள் 'சரி'யாக வாக்களிக்க அறிவுறுத்தப்பட்டதால். மிகவும் குறுகிய வெற்றி பெற்ற யெல்ட்ஸின் தன் பாலிஸியை தொடர்ந்தார்.

ஒரு உதாரணம். மிக்காயில் கோடர்கோவ்ஸ்கி. 2004 ஆம் ஆண்டில் உலகப் பெரும் பணக்காரர்கள் பட்டியலில் 16 ஆவது இடம். ரஷ்யாவின் மிகப்பெரும் பணக்காரர். (கொசுறு செய்தி: பில்லியனர்கள் அதிகம் வாழும் நகரம் என்ற பெருமையை நியு யார்க்கிடமிருந்து மாஸ்கோ சென்ற வருடம் கைபற்றியது! மாஸ்கோ: 33, நியு யார்க்: 31) அவரைக் கைது செய்தது மனித உரிமை மீறல் என்று பூடின் மீது சேறு வாறி இறைக்கும் மேற்கத்திய ஊடகங்கள் அவர் எப்படி அவ்வளவு பெரும் பணம் ஈட்டினார் என்று கேள்வி கேட்க மாட்டார்கள். அவரின் எண்ணெய் நிறுவனமான யூகோஸ் இன்றைய சொத்துமதிப்பு 31 பில்லியன் $. அத்தகைய நிறுவனத்தின் 78 சதவிகித பங்குகளைப் பெற கோடர்கோவ்ஸ்கியின் மெனடெப் குழுமம் கொடுத்தது... வெறும் 450 மில்லியன் $. வாங்கி இருவருடங்களில் செய்த மதிப்பீடு படி அப்போதைய யூகோஸின் மதிப்பு 9 பில்லியன் $.உண்மைதான் பூடின் நடவடிக்கை எடுத்ததற்கு அரசியல் காரணமும் உண்டு. ஆனால், வெட்கமேயில்லாமல் சொந்த நாட்டையே சுரண்டி ஏப்பம் விட்டவருக்கு என்ன பெரிய வக்காலத்து வாங்க வேண்டியிருக்கிறது? இவர் ஒருவர் மட்டுமில்லை யெல்ட்ஸினின் காலத்தில் தலையெடுத்த இந்த சுரண்டல் கூட்டத்திற்கு பெயர் "oligarchs". போரிஸ் பெரஸோவ்ஸ்கி, வ்ளாடிமிர் குஸின்ஸ்கி என்று பத்து பன்னிரண்டு பேர் இருந்தனர். ஒவ்வொருவராய் பூடினின் நடவடிக்கைகளில் மாட்டிக்கொள்ள எஞ்சியிருப்பது மிகச்சிலரே. ரோமன் அப்ரமோவிச் அதில் மிகப் பிரபலம். ஆங்கில கால்பந்து அணியான செல்ஸியை வாங்கியவர். ஒரு மாநிலத்திற்கு கவர்னராகவும் தற்போது இருக்கிறார்.

இவர்கள் creme de la creme. சிறிய அளவில் பல்லாயிரக்கணக்கானவர்கள் இன்னும் சத்தமில்லாமல் இருக்கின்றனர். 1998-ஆம் வருடம் ஆசிய பொருளாதார வீழ்ச்சியினாலும், எண்ணெய் விலை அதலபாதாளத்திற்கு விழுந்ததனாலும் ரஷ்ய பொருளாதார நெருக்கடி ஏற்பட்டது. ஒரு டாலருக்கு 6000 ரூபிள்கள் என்று இருந்தது, 14000, 17000, 21000 என்று ஒரே வாரத்தில் வீழ்ந்தது. அப்போதெல்லாம் எங்களுக்கு நல்ல காலம். டாலர் கையிருப்பால். பின்னர், எப்போதென்று சரியாக நினைவில்லை. கடைசியில் இருக்கும் மூன்று ஜீரொக்களை மக்கள் வசதிக்காக நீக்கினார்கள். IMF கொடுத்த 22.5 பில்லியன் கடனாலும், உலகச் சந்தை ஒருவாறு ஸ்டபிலைஸ் ஆகி எண்ணெய் விலை மீண்டும் ஏறத்தொடங்கியதாலும் தட்டுத்தடுமாறி கிரைஸிஸிலிருந்து வெளிவந்தது.

அரசியல் நிலைமையும் சீரானதாய் அக்காலத்தில் இல்லை. செர்னோமிர்டின், கிரியென்கோ, ஸ்டெபாஷின், ப்ரிமாகோவ் என்று ஆறேழு பேர் பிரதமர்களாய் musical chair விளையாடினர். காரணம் யெல்ட்ஸின்!

இதைத்தவிர, சமூக அளவிலான பிரச்சனைகளும் தலைதூக்க ஆரம்பித்தன. குடிப்பழக்கம், கிரைம், போதை மருந்து, எய்ட்ஸ், டி.பி என்று திண்டாடினார்கள். காரணம், வேலைவாய்பின்மை, நிரந்தரமினமை.

1999-இல் ஒருவழியாய் நல்ல காலம் பிறந்தது. உலகச் சந்தையில் ரஷ்யாவின் முக்கிய ஏற்றுமதியான எண்ணெயின் விலை கிடுகிடுவென ஏறத்தொடங்கியது. யெல்ட்ஸின் திடீரென்று பதவி விலக முடிவு செய்து தம் வாரிசென்று அதுவரை அறியப்பட்டிராத முன்னாள் கேஜிபியான பூடினை நியமித்தார். பிரதமர் ஆனவர் பின்னார் அதிபராகவும் ஆனார். தலைவர் சொன்னதுபோல் பாய்ந்து ஓடும் குதிரையாய் துள்ளிக்குதித்து எழுந்து முன்நோக்கி பாயத்தொடங்கியது ரஷ்ய பொருளாதாரம்.

---------
Local Tips:
வெளியில் செல்லும்போது எந்நேரமும் பாஸ்போர்ட் வைத்திருக்கவேண்டும். மூன்று நாட்களுக்குமேல் ரஷ்யாவில் தங்கினால் நீங்கள் தங்கும் நகரத்திலுள்ள உள்துறை அமைச்சகத்தின் "ரெஜிஸ்ட்ரேஷன்" எனப்படும் ஸ்டாம்ப் உங்கள் பாஸ்போர்டிலோ, அல்லது நுழைந்தபோது அளிக்கப்பட்ட migration card இலோ இருக்க்வேண்டும். பெரும்பான்மையான ஓட்டல்கள் இந்த ஸ்டாம்ப்பை இலவசமாக பெற்றுத்தந்துவிடுவர். டிரான்ஸிட் விசாவில் வருவோருக்கு 15 நாள் டைம் உண்டு.

ராண்டமாக டாகுமெண்ட் சோதனைகள் நடத்த போலிஸுக்கு அதிகாரமுண்டு. சரியான முறையில் இல்லையென்றால் அபராதம் கட்டவேண்டி வரும்.


---------
5 ரஷ்ய வார்த்தைகள்

1. தொலைபேசி: Thi-li-fon - телефон
2. கழிவறை: Thu-a-lyet - туалет
3. ஓட்டல்: Ga-sthi-ni-tsa - гостиница
4. உணவகம்: Ri-Stho-Ran - ресторан
5. ஹாஸ்டல்: Obshe-zhi-thi-ye - общежитие


(தொடரும்)



முந்தைய பதிவுகள்: 1, 2, 3, 4

இ.பி - 4: பூலோக வைகுண்டமா, நரகமா?

சென்ற பதிவில் KGB, GRU, அரசியல் கொலை என்றெல்லாம் பயங்காட்டினேன் இல்லையா? அதைப் படித்துவிட்டு மேற்கத்திய ஊடகங்கள் மற்றும் அரசுகளின் "SU was all evil" என்ற கருத்தில் நம்பிக்கை ஏற்படலாம். ஆனால், அது முழுக்கவும் உண்மையானதன்று. சமுதாயக் கண்ணோட்டத்தில் பார்த்தால் சோஷலிஸ தத்துவம், அந்த வகையில் சோவியத் யூனியன் மனிதர்களுக்கானது. வேலைப் பாதுகாப்பு, கல்வி, இருக்க இடம், உண்ண உணவு, ஆரோக்கியம் என்று எல்லாம் எல்லார்க்கும் வேண்டும் என்று வலியுறுத்திய மேன்மையான மார்க்கம் அது. அதே நேரத்தில், மேற்கத்திய சந்தைப் பொருளாதாரத்தை ஒரு அடி தள்ளியிருந்து ஆராய்ந்தால் அது ஒரு "jungle" சமூகம் என்று புரியும். survival of the fittest அல்லது strongest என்பதே அதன் அடிப்படைத் தத்துவம். ஆனால் சோஷலிஸம் வலிமையான குழந்தைகளுக்கு அளிப்பது போலவே நோஞ்சான் குழந்தைகளுக்கும் வாழ்வதற்கு அடிப்படை வசதிகள் அமைத்துத்தரும் மனித பெற்றோர் போன்றதாகும். நானும் சொல்வேன், சோவியத் யூனியன் சோஷலிஸத்தின் உயர்ந்த எடுத்துக்காட்டு இல்லை. அதற்கு காரணம் சுயநலமிக்க மனிதர்களேயன்றி, கொள்கையல்ல. இருந்தாலும் சோவியத் அரசில் இன்றளவும் வளர்ந்த நாடுகளில் நடக்காத பல நல்ல விஷயங்கள் நடந்தன. அவையாவை என்று பார்க்கலாமா?

விவசாயத்தை மட்டுமே பெரும்பாலும் நம்பியிருந்த ரஷ்ய மற்றும் மத்திய ஆசிய நாடுகள் சோவியத் யூனியன் என்னும் ஒரே காரணத்தினாலேயே தொழிற் சார்ந்த வளர்ந்த பொருளாதாரங்கள் ஆகின. ரஷ்யா அதுவரையில் ஓரளவு வளர்ச்சி பெற்றிருந்தாலும் மற்ற நாடுகளுடன் சேர்ந்து மிகக் குறுகிய காலத்தில் கட்டமைப்பு விஷயங்களில் வியத்தகு வளர்ச்சிபெற்றன.

முதலில், என்னைப் பொறுத்தவரை மிடில் ஏஜஸிலும், பிறகு ஸ்டீம் எஞ்சினால் ஐரோப்பாவில் நடந்த மாபெரும் தொழிற்புரட்சியும் பெரும்பாலும் ரஷ்யாவை அவ்வளவு எளிதில் வந்தடையவில்லை. இம்பீரியல் ரஷ்யாவை ஆண்டவர்கள் சுகமாய் வாழ்ந்தார்களைத் தவிர ஏழை மக்கள் நிலை சிறிதும் உயரவில்லை. கல்வியறிவின்றியும், ஏழ்மையிலும் சிக்கி தவித்தனர் பாமரர்.

1917 புரட்சிக்குப் பின் நிலைமை தலைகீழாய் மாறியது. இராட்சத வேகத்தில் தொழிற்புரட்சி நடந்து முப்பது ஆண்டு காலத்திற்குள் மிகவும் முன்னேறிய நாடுகளில் ஒன்றானது. அதற்கு ஒரு முக்கிய காரணம் கட்டாய கல்வியறிவு. ஆண் பெண் பேதமின்றி அனைவருக்கும் கல்வி கட்டாயமாக்கப்பட்டது. அநேகமாக எல்லா ஊர்களிலும் மேல்நிலைப் பள்ளிகள், அடிப்படை கல்லூரிகள் அமைக்கப்பட்டன. முக்கிய நகரங்களில் பல்கலைக்கழகங்கள் நிறுவப்பட்டன. குறிப்பிட்டு சொல்லவேண்டியது மாஸ்கோவிலுள்ள Moscow State University மற்றும் St.Petersburg State Technical Univ போன்றவை. இவைத்தவிர, பல்வேறு ஆராய்ச்சி நிறுவனங்கள் நிறுவப்பட்டன. இவற்றில் படிப்பதற்கும் ஆட்கள் கூட்டம் நிரம்பி வழிந்தன. இந்த வகையில் வந்தது தான் 99.6 சதவிகித படிப்பறிவு.

வீட்டு வசதி என்று எடுத்துக்கொண்டால் அனைவருக்கும் வீடு என்ற கொள்கை இருந்தது. பதினெட்டு வயதிற்கு மேற்பட்டோருக்கு பதிவு செய்ததன் அடிப்படையில் முதலுரிமை அளிக்கப்பட்டது. பெரும் நகரங்களென்றும், Soviet Style குடியிருப்புகள் ஆயிரக்கணக்கில் கட்டப்பட்டன. நம்மூரைப்போல தனித்தன்மையுடைய வீடுகள் இல்லாமல், அனைவருக்கும் ஒரேவிதமான வீடுகள் என்று வழங்கப்பட்டது. Квартира (குவார்த்தீரா) என்றழைக்கப்பட்டவை இந்த அப்பார்ட்மெண்ட்கள். pre-contructed blocks-ஆக கொண்டு வந்து ஓன்று சேர்த்து பலமாடிக் குடியிருப்புகளாய் மாறின. தனித்தன்மை இல்லாமல் இருந்தாலும் மக்களில் பெரும்பாலானோர்க்கு வீட்டு வசதி செய்து கொடுக்கப்பட்டது. ஆனால், இந்த மாதிரி தனி அப்பார்ட்மெண்டுகளுக்கு காத்திருக்க வேண்டும். அம்மாதிரி முடியாதோரருக்காகவே communalka என்றழைக்கப்பட்ட கட்டிடங்களும் உண்டு. அவற்றில் மூன்று, நான்கு ரூம்கள் கொண்ட apt-இல் ஒவ்வொரு ரூமிற்கும் ஒரு குடும்பம். இவைகளுக்கு பொதுவாய் சமையலறையும், கழிவறை மற்றும் குளியலறை. அதே போல் பொதுவாக தொலைபேசி, மின் கட்டணம் போன்றவை. இதில் ஒரு சுவாரசியமான விஷயம். நம்மூரில் ஒரு ரூம் அப்பார்ட்மெண்ட் என்றால் ஒரு பெட்ரூம், ஒரு லிவிங் ரூம் மற்றும் கிச்சன், பாத்ரூம் இல்லியா? இங்கே அப்படியில்லை. ஒரு ரூம் அப்பார்ட்மெண்ட் என்றால் ஒரே ரூம் (லிவிங்/பெட்) அப்புறம் கிச்சன், பாத்ரூம்.

அடுத்தது healthcare. சோவியத் காலத்தில் காஸ்மெடிக் சிகிச்சைகள் தவிர முற்றிலும் இலவசம். போர் veteran-களுக்கும் 60 வயது தாண்டியவர்க்கும் முற்றிலும் இலவசம் இன்றளவும். வேறென்ன வேறென்ன வேண்டும் என்ற பாடல் நினைவுக்கு வருகிறதல்லவா? கர்ப்பிணிப் பெண்கள் உட்பட. குழந்தைகள் நலத்தில் கூட முன்னணி. இலவச க்ரெச்-கள் மற்றும் சுகாதார மையங்கள். ஆனால், தரத்தில் குறைந்தவை அல்ல. இந்த விஷயத்தில் இன்றளவும் மேற்கத்திய நாடுகளால் ஈடுகொடுக்க முடியவில்லை.

வேலைவாய்ப்பு என்பது பிரச்சனையாகவே இல்லை. job security-உம் அதிகம். ஆனால் இந்த வகை உத்திரவாதத்தினால் உற்பத்தித்திரன் குறைந்ததென்னவோ உண்மை. மேலும், பணியுயர்வு சீனியாரிட்டி படியே நடந்தது. மெரிட்டினால் அல்ல. இது ஒரு புறமென்றால், டார்கெட்டை அடைவதற்குத் ஊக்கங்கள் கொடுக்கப்பட்டதேயொழிய பொருளின் தரம் குறித்து கவலைப்படவில்லை.

அடுத்து போக்குவரத்து. அறுபது வயதிற்கு மேற்பட்டோருக்கும் முன்னாள் இராணுவ வீரர்கள் குடும்பங்களுக்கும் முழுக்க இலவசம். மற்றவர்க்கும் ஒன்றும் அவ்வளவு விலையுயர்ந்ததல்ல. ஒப்பீடுக்கு இன்றைய தேதியில் மாஸ்கோவின் ஒரு மெட்ரோ பயணத்திற்கு டிக்கட் விலை - 13 ரூபிள்கள் (50 cents). அதுவும் மெட்ரோவிற்குள் நுழைவதற்குத்தான் இந்த விலை. உள்ளே சென்றுவிட்டால் எவ்வளவு தூரம் வேண்டுமானாலும் பயணம் செய்யலாம். காலை ஆறு மணியிலிருந்து இரவு ஒரு மணி வரை மெட்ரொவிற்குள்ளேயே சுத்தலாம். சோவியத் காலத்தில் இன்னும் மலிவாகவே இருந்திருக்கவேண்டுமல்லவா?

பெண்களின் நிலை முன்னேறியதாகவே இருந்தது. கட்டாயக் கல்வி ஆனதாலும், சமத்துவக் கோட்பாடு புகுத்தப்பட்டதாலும், பெரும்பாலான பெண்கள் வீட்டில் அடைந்து கிடக்காமல் சுதந்திரமாய் வெளியில் வந்தனர். 99 சதவிகிதத்திற்கும் மேலான படிப்பறிவு இன்றளவும் தொடர்ந்து வருகிறது. டிரெடிஷனலான கல்வி மற்றும் மருத்துவத்துறையில் பெரும்பாலான இடங்கள் பெண்களுக்கே. இவை தவிர, பெண்கள் மற்ற நாடுகளில் அச்சமயத்தில் நுழையாத விஞ்ஞான, ஆராய்ச்சி, பொறியியல் என்றும் சக்கைபோடு போட்டார்கள். ஆண்களின் துணை தேவையில்லாமல், தனித்தே வாழ முடியும் என்று 30-40 வருடங்களுக்கு முன்னரே புரட்சி செய்தனர்.

விவசாயமும் நவீனப்படுத்தப்பட்டது. யாரோ ஒரு ஜமீந்தாருக்கு உழைத்துக் கொட்டாமல், கலெக்டிவைஸ்டு பார்ம்களின் பயன் உழைப்பாளிகளை நேரடியே சென்றடைந்தது.

அரசியல் செல்வாக்குடையவர்களுக்கு மரியாதை தனி. அதை விட்டு பார்த்தால் சமத்துவமே எங்கும். கடைநிலை பணியாளர் ஆனாலும், மேலாளர் ஆனாலும் அவர்கள் செய்யும் தொழிலுக்கு மரியாதை உண்டு. இது சார்ந்த ஒரு பழைய பதிவு இங்கே.

மொத்தத்தில், அதுவரைக்கும் ஒன்றுமில்லா நாடுகள் ஒன்று சேர்ந்து உலகத்தையே மிரட்டும் அளவுக்கு அசாத்யமான அறிவியல் வளர்ச்சியும், ஆயுத பொருளாதார வளர்ச்சியும் பெற்றன. வெறும் 30 ஆண்டுகளுக்குள் உலக வல்லரசாகி கிட்டத்தட்ட நாற்பது ஆண்டுகள் அமெரிக்காவிற்கு ஈடுகொடுத்து bipolar world என்று எல்லோரும் சொல்லும் வண்ணம் வலியுற்றிருந்தது. எல்லாம் சரி, ஆனால் இந்த அந்தஸ்து கிடைக்க அம்மக்கள் கொடுத்த விலை? தனிமனித சுதந்திரம் தான்.

-------
Local Tips
ரஷ்யாவிற்கு பயணிப்பதாய் இருந்தால் பணத்தை டாலராகவோ அல்லது உங்கள் ஊர் கரென்ஸி பெரிய அளவில் புழங்குவதென்றால் அதிலேயே கூட கொண்டு வரலாம். பாங்குகளிலும் மாற்றிக் கொள்ளலாம் ஆனால் அதை விட வசதி: நம்மூர் பொட்டிகடை போல "கரென்ஸி எக்ஸ்சேஞ்" எல்லா இடத்திலும் இருக்கும். обмен валюты என்று எழுதி வைத்திருப்பார்கள். வெளியிலேயே எக்ஸ்சேஞ் ரேட்டும் போட்டிருப்பார்கள். சில இடங்களில் கமிஷன் பெற்றுக்கொள்வார்கள். ரஷ்ய மொழி தெரியவேண்டுமென்ற அவசியமில்லை. பணத்தையும், பாஸ்போர்ட்டையும் கொடுத்தால் அவர்களே ரூபிளாக மாற்றித் திருப்பித்தந்துவிடுவார்கள்.

பணமாக கொண்டுவராமல் உங்கள் சர்வதேச ஏடிம் கார்டுகளோ அல்லது டிராவலர்ஸ் செக்-காகவும் எடுத்து வரலாம். ஏ.டி.எம்-களுக்கு "Банкомат" என்று எழுதியிருக்கும். காசோலைகளை வங்கிகளிலோ அல்லது மேற்சொன்ன எக்ஸ்சேஞ்ச் செண்டர்களிலோ மாற்றலாம்.

-------
5 ரஷ்ய வார்த்தைகள்
1. car: ma-shyi-na - машина
2. Bus: avto-bu(உ)s - автобус
3. Metro/ Subway: Mi-thro - метро
4. Train: po-ezd - поезд
5. Plane: sa-ma-lyoth - самолёт

அடுத்த பதிவில் சோவியத் யூனியன் வீழ்ந்த பின் ரஷ்யர்களின் தலையில் விழுந்த இடி பற்றி.

(தொடரும்..)


முந்தைய பதிவுகள்: 1, 2, 3

இ. பி - 3: யூனியனின் கடைசி அத்தியாயம்

சென்ற பதிவை படிக்காதவர்கள் அதைப் படித்துவிட்டு தொடர்ந்தால் இப்பதிவு இன்னும் எளிதாக இருக்கும். பதிவின் முடிவில் இருவரைப் பற்றிச் சொன்னேனல்லவா? அவர்களில் ஒருவர் உலகெங்கும் கொண்டாடப்படும், ஆனால் ரஷ்யாவில் அடியோடு வெறுக்கப்படும் கோர்பசேவ். ஆனால், அந்த இரண்டாவது அதிரடி ஆசாமி யார் என்று இன்னும் புரியாதவர்களுக்கு - அவர் தான் போரில் யெல்ட்சின் (Boris Yeltsin). இவர் என்ன செய்தார் என்று சிறிது நேரத்தில் பார்ப்போம்.

முதலில் கோர்பசேவ். இவரின் "பெரிஸ்ட்ரோய்கா", "க்ளாஸ்நோஸ்த்" மற்றும் "உஸ்கோரெனியெ" பாலிஸிகள் மிகவும், குறிப்பாய் மேற்கத்திய நாடுகளில் பிரபலமானவை. முறையே மறுகட்டுமானம், transparency மற்றும் விரைவுபடுத்துதல் என்று பொருள் கொள்ளலாம். 1987-இல் இத்திட்டங்களில் மூலம் சோவியத் யூனியனை ஊறித்தேங்கிப் போன ஊழலலிருந்தும், ரெட்-டேப்பிலிருந்தும், அதிதீவிரமான சென்ஸார்ஷிப்பிலிருந்தும் விடுவிக்க முயன்றார் கோர்பசேவ். ஆனால், ஆட்சிசுகத்தில் திளைத்திருந்த அவரின் கட்சிசகாக்கள் இந்த மாற்றங்களை விரும்பவில்லை. கருவிக்கொண்டே காத்திருந்தனர். ஆனால், அவரால் கட்டவிழ்க்கப்பட்ட பேச்சு சுதந்திரம் அவருக்கே எதிரியாய்ப் போனது. சோவியத் யூனியனின் குளறுபடிகள், குழப்பங்கள் எல்லாம் ஊடகங்களின் மூலம் வீதிக்கு வந்தது. அன்றளவிலும் தெய்வமாய் வணங்கப்பட்ட ஸ்டாலினின் கொடுங்கோல் முறைகள் அம்பலமாயின. அதுவரை பொறுத்திருந்த மத்திய ஆசிய நாடுகளின் anti-russian எண்ணங்கள் தீவிரமாய் வேரூன்றத்தோன்றியது. செய்வதறியாது தவித்த கோர்பசேவ், சோ.யூ-வின் முதல் ஜனநாயக தேர்தலை நடத்தி அதில் முதலும் கடைசியுமாக சோவியத் ஜனாதிபதியானார்.

இந்த நிலையில் இடையில் புகுந்தார் யெல்ட்சின். சோ.யூவின் அங்கமான Russian Socialist Republic இன் Congress of soviet deputies தலைவராய் தேர்ந்தெடுக்கப்பட்டவர், முதல் காரியமாக சோவியத் யூனியனின் சட்டங்கள் சில தங்களுக்கு ஒவ்வாது என்று குண்டைப் போட்டார். கோர்பசேவ்வை பொதுவில் பலமுறை அவமானப்படுத்தி சோ.யூவின் பொதுச் செயலாளர் ஒன்றும் கடவுள் இல்லை என்று உணர்த்தினார். கோர்பசேவ் zero வாகவும் யெல்ட்சின் ஹீரோவாகவும் மாறியது: ஆகஸ்ட் மாதம் 1991-ஆம் வருடம் தீவிர கம்யூனிஸ்ட் கட்சியினர் சிலர் இராணுவத்தின் உதவியோடு கோர்பசேவை வீட்டுச் சிறை பிடித்து, சுதந்திரப் பிரகடனம் செய்த ரஷ்யாவை அடக்க அதன் வெள்ளை மாளிகை மேல் டாங்கிகளை ஏவினர். ஆனால், பொறுமையிழந்த மக்கள் யெல்ட்ஸினின் பின்னால் அணி திரண்டு செய்த ஆர்ப்பாட்டத்தினால் இராணுவம் பின்வாங்கியது. ஒரு வழியாய் 24 ஆகஸ்ட் 1991 விடுதலை என்று வந்தது. கோர்பசேவ் ஜனாதிபதி என்று விடுவிக்கப்பட்டாலும், அவரின் ஆட்சி அதிகாரம் செல்லுபடியாகவில்லை. ஆனாலும் 91-ல் நடத்தப்பட்ட வாக்கெடுப்பில் பெரும்பாலான மக்கள் சோவியத் யூனியன் நிலைத்திருக்க வேண்டுமென்றே விரும்பினர். ஆனால், மற்ற நாடுகளை அடக்கியாளும் தெம்பு கோர்பசேவிடத்தில் இல்லை.

டிசம்பர் 8, 1991 - உக்ரேயின் மற்றும் பெலாருஸ்ஸூடன் சேர்ந்து ரஷ்யா, சோவியத் யூனியன் இனி செல்லுபடியாகாது என்றும் அதற்கு பதில் தன்னிச்சையான CommonWealth of Independent States உருவாக்கப்படும் என்று பிரகடனம் செய்தது. டிசம்பர் 24, ரஷ்யா ஐக்கிய நாடுகளின் பாதுகாப்பு கவுன்சிலில் சோவியத் யூனியனின் இடத்தை ஏற்றது. அடுத்த நாளே பதவியை ராஜினாமா செய்த கோர்பசேவ், அதன் மூலம் சோவியத் யூனியனிற்கு முடிவுரை எழுதினார்.

சரி, ஒருவழியாய் குழப்பம் தீர்ந்து நல்ல காலம் பிறக்கப்போகிறது என்று எண்ணிய ரஷ்யர்களின் தலையில் விழ மாபெரும் இடியொன்று காத்திருந்தது தெரியாமல் ஆர்வத்துடன் பொற்காலத்தை எதிர்பார்த்திருந்தார்கள். சோவியத் கால நிலைமையே தேவலை என்று மக்களை நினைக்க வைக்கும் அளவிற்கு இருந்தது அந்த அதிர்ச்சி. அப்படி என்ன அதிர்ச்சி என்று பார்ப்பதற்குமுன் - எப்படி மக்கள் அந்த பழைய அடிமை வாழ்க்கையையே மீண்டும் விரும்பி ஆதரிக்குமளவிற்கு மாறினார்கள் என்று உங்களில் சிலர் ஆச்சரியப்படலாம். அப்படி அதிசயப்படுபவர்களுக்கு சோவியத் நாடுகளில் இருந்த propaganda பீரங்கிகளுக்கு நிகராக அதே அளவு வீரியத்துடன் மேற்கத்திய நாடுகளிலும் பிரச்சார பீரங்கிகள் இயங்கி வந்தன என்பதே செய்தியாய் இருக்கலாம். சோவியத் யூனியன் பூலோக நரகம், அங்கு இருந்தவர்கள் எல்லோரும் கொடியவர்கள் என்பது மேற்கத்திய பீரங்கிகளின் நிரந்தர பிரச்சாரம். அப்படி உண்மையாகவே பூலோக நரகமா, சுவர்க்கமா என்று அடுத்த பதிவில் பார்ப்போம்.
-----
சரி, இப்போ ஒரு புது பகுதி: தினசரி ஐந்து ரஷ்ய வார்த்தைகள் - பயனுள்ளதாய் இருக்கும் என்று நினைக்கிறேன்

எப்படி ஒலிக்கவேண்டும் என்பதை மட்டும் rough-ஆக ஆங்கிலத்தில் சொல்லி விடுகிறேன். "-" syllable பிரிவதைக் குறிக்கிறது.
1. வணக்கம் - formal : Drasth-vy-iche - Здраствуйте
2. வணக்கம் - informal : Pri-vy-et - Привет
3. நீங்கள் ஆங்கிலம் பேசுவீர்களா?: Vi Ga-va-ri-che pa Ang-lis-ki? - Вы говорите по Английский?
4. நன்றி: Spasibo - Спасибо
5. Bye - formal: Das-vi-dan-ya До-Сведения

-----
இன்னொரு புதிய பகுதி: Local Tips
1 US$ = 28.5 Rubles
1 Euro = 35.6 Rubles
1 Ruble = 55.29 INR
ரூபிள்ஸ் கரன்ஸி நோட்டுகள்: 10,20,50,100,500,1000 மதிப்புகள்
ரூபிள்ஸ் சில்லறை மதிப்புகள்: 1,2,5, 10 (அரிது)

1 ruble = 100 Kopeks
கோபெக்ஸ் மதிப்புகள்: 1,5,10,50
------------

(தொடரும்)

முந்தைய பாகங்கள்:
1. some facts
2. குட்டி வரலாறு

இரும்புத்திரைக்கு பின்னாலிருந்து - 2: வரலாறு

இந்தப் பதிவப் படிக்க கம்பூயூட்டர், இணைப்பு தவிர தேவையான பொருள் ஒன்னு இருக்கு. அது கொசுவத்திச் சுருள். லிக்விடெல்லாம் சரியா வராது. டார்டாய்ஸ் வாங்கி நல்லா பக்கத்திலேயே பத்தவச்சுக்குங்க. ஏன்னா, கொஞ்சம் வரலாறு பாக்கணும் இன்னிக்கு. ரஷ்யாவின் குறிப்பா சோவியத் வரலாறு பத்தி பலருக்கும் தெரிந்திருந்தாலும், மெகாத்தொடர்னு எழுத ஆரம்பிச்சுட்டா வரலாறுன்னு சொல்லி நாலுவாரம் இழுக்கற அருமையான சான்ஸையெல்லாம் விட்டுட முடியுமா? என்னைப் பொறுத்தவரை ரஷ்ய வரலாற்றை சோவியத் யூனியன் உடைவதற்கு முன்னும் பின்னும் என்று பிரிக்கலாம். எவ்வளவு சுருக்கமா சொல்ல முடியுமோ சொல்லிடறேன்.

12-ஆம் நூற்றாண்டு வரை பல்வேறு விதமான tribes ஆக பிரிந்து இருந்த ரஷ்ய மண்ணில் Grand Duchy of Muscovy என்ற பெயரில் பிரிமிடிவ் அமைப்பு தோன்றியது. டானியல் அலெக்ஸாண்ட்ரோவிச் என்பவர் மாஸ்கோ நகரம் இருக்கிற ஏரியாவில் தக்கணூண்டுக்கு ஆரம்பித்த நாடு இன்று மேற்கில் போலந்து, பின்லாந்து என்று தொடங்கி சீனா, மங்கோலியா வரை விரிந்து கிழக்கே ஜப்பான் அருகே வரை பரந்து கிடக்கிறது. இந்த விரிவாக்கத்தை மிக வெற்றிகரமாக நடத்தியது மூன்றாம் இவான். இவனின் கீழ் தான் பிரம்மாண்ட சைபீரியா ரஷ்யாவின் கீழ் வந்தது. பின்னர் கொடுங்கோலன் இவான் 1V, கேத்தரீனா என்று பலரின் கீழ் ஐரோப்பிய இராஜாங்கங்களிடையேயும் குலாவத் தொடங்கியது ரஷ்யா. ஜார் என்று சொன்னவுடன் சட்டென பலருக்கும் நினைவுக்கு வருவது இரண்டாம் நிக்கோலாஸ் தான். முதலாம் உலகப்போரில் ஏற்பட்ட பெருந்தோல்வியாலும், வழக்கம்போல் ஏழைகளை குறித்து கவலையில்லாமல் சுகபோக வாழ்வில் ஈடுபட்டிருந்த நிக்கோலாஸ் 1917-இல் நடந்த புரட்சியை அடக்க முடியாமல், போல்ஷேவிக்குகளிடம் பிடிபட்டு பரிதாபமாக கூண்டோடு கைலாசம் போனான். அதோடு ஜார் வம்சம் அழிந்தது.

லெனினுக்கு பின் 1927-இல் ஆட்சி பீடத்தில் ஏறினான் ஜார்ஜியாவைச் சேர்ந்த கொடுங்கோலன் ஜோசப் ஸ்டாலின். அப்போதுவரை விவசாயத்தையே பெரும்பாலும் நம்பியிருந்த நாட்டில், அதிரடியாய் தொழில்துறை மற்றும் கட்டமைப்பு முன்னேற்றம், பொதுவுடைமையாக்குதல்னு பல காரியங்களைச் செய்தான். ஸ்டாலின் மட்டும் இல்லாதிருந்தால், சோவியத் யூனியன் முன்னேறியிருக்க வாய்ப்பே இல்லையென்று கூறுவோரும் உண்டு. கிராம நிலங்களையெல்லாம் கல்ஹோஸ் என்ற பெயரில் collectivization செய்யப்பட்டது. குறிப்பாய் கஸ்ஸாக்ஸ் எனப்படும் மக்கள் வசித்த தற்போதைய கஸக்ஸ்தானில் பெரும் ரத்தவெள்ளத்தில் இந்தத் திட்டங்கள் நிறைவேற்றப்பட்டன. முதலாம் ஐந்தாண்டுத் திட்டம் என்கிற பெயரில் ஆரம்பிக்கப்பட்ட இந்த மாற்றத்தை எதிர்த்தோர் கையாளப்பட்டவிதம் ஹிட்லரையே மிஞ்சிவிடும். The Great Purges என்றழைக்கப்படும் இந்தக் கொடுமையான காலத்தில் அறிவாளிகள் எனக் கருதப்பட்ட விஞ்ஞானிகள், மருத்துவர்கள், ஆசிரியர்கள், இராணுவ அதிகாரிகள், பொறியாளர்கள் என பாகுபாடின்றி சைபீரியாவில் உருவான குலாக்குகளில் அடைக்கப்பட்டு சித்திரவதை செய்யப்பட்டார்கள். உலகின் முதல் concentration campகள் இந்த gulag-கள். இதில் இறந்தோர் எண்ணிக்கை பலலட்சங்கள். இன்றளவும் மாஸ்கோவின் முக்கிய சாலைகளில் ஒன்றான Kutuzovskiy Prospekt-இல் உள்ள வெற்றிப்பூங்காவிற்கு இடப்பக்கம் திரும்பினால் Matvievskoe என்றழைக்கப்படும் குட்டி காட்டிற்குள் ஸ்டாலினின் டாச்சா (பண்ணை வீடு) இருக்கிறது (டாச்சா என்பது என்ன என்று வேறொரு சமயம் பார்ப்போம்). அந்த வழியாக சென்றாலே பீதியாய் இருக்கும். இந்த பர்ஜஸ் குறித்து ஸ்டாலின் இரவுச்சாப்பாட்டு நேரங்களில் தன் அந்தரங்க சகாக்களுடன் பல முடிவுகள் எடுத்தது இந்த வீட்டில்தான். மேலும் மேற்கு ரஷ்யாவில் இருந்த பல கிராமங்களை கூண்டோடு புகைவண்டியில் ஏற்றி கிழக்கில் சைபீரியா, ஆசியா பகுதிகளில் அத்துவானத்தில் செட்டில்மெண்டுகள் நிறுவ திட்டங்கள் தீட்டியதும் இங்குதான். அது ஏனென்றால் மத்திய மற்றும் கிழக்கு ரஷ்யாவில் மேற்கத்திய காக்கேஸியன் ரஷ்யர்களை குடியேற்றத்தான். இப்படி தனிமனித அளவில் கொடுமைப்படுத்தப்பட்டாலும், சோவியத் யூனியன் நாடென்றளவில் தொழில்துறையில் அபரிமிதமான வளர்ச்சியடைந்தது.

நாஜி ஜெர்மனியுடன் இரண்டாம் உலகப்போருக்குமுன் சமரச ஒப்பந்தம் செய்துகொண்ட ஸ்டாலின் போர் முன்னேற்பாடுகளை கவனிக்காமல் அசட்டையாக இருந்தான். ஹிட்லரின் படைகள் சான்க்ட் பீட்டர்புர்க்கை சூழ்ந்து கொண்டு இரண்டரை வருடங்களுக்கு சீஜ் வைத்தன. பல மில்லியன் மக்கள் மாண்ட இந்த சீஜில் தம் செல்லப்பிராணிகளையும், சில சமயங்களில் இறந்தவர்களையும் உணவுத்தட்டுப்பாட்டை தவிர்ப்பதற்க்காக உண்ணும் பரிதாப நிலைக்கு தள்ளப்பட்டனர் பீட்டர்புர்க் மக்கள். இன்றளவும் ரஷ்ய மக்களிடம் ஆறாத ரணம் இந்த இரண்டாம் உலகப்போர். ஏறத்தாழ 10 மில்லியன் ரஷ்யர்கள் உயிரிழந்தனர். தோல்வியின் விளிம்பிற்கே போன சோவியத் யூனியனுக்கு சாதகமாய் இரு விஷயங்கள் இருந்தன. ரஷ்யாவின் சீதோஷ்ண நிலை மற்றும் மிச்ச இடங்களில் பெற்ற தோல்விகளின் காரணமாகவும் ஜெர்மானிய இராணுவம் சோர்வடையவே சந்தர்ப்பத்தை பயன்படுத்திக்கொண்டு பெர்லின் வரை துரத்திச்சென்று பெர்லினை அமெரிக்க/பிரித்தானிய படைகளுக்கு முன்னர் கைபற்றியது சிகப்பு இராணுவம். ஸ்டாலின் இச்சமயத்தில் மிகச்சாதுர்யமாக கிழக்கு ஐரோப்பிய நாடுகளில் இருந்த கம்யூனிச எதிர்ப்பாளர்களை ஜெர்மானியர்களிடம் போர் புரிய ஆசைகாட்டி, அவர்களுக்கு உதவாமல் கைவிட்டான். இதன் மூலம் சோவியத் யூனியனின் சிகப்பு கரம் எதிர்ப்பின்றி கிழக்கு ஐரோப்பாவை நோக்கி நீள ஆரம்பித்தது. அமெரிக்க தலையீடு இல்லையென்றால், அப்போது போரினால் நலிந்திருந்த மேற்கு ஐரோப்பாவும் சோ.யூனியனின் குடையின் கீழ் வந்திருக்கும் என்பது என் ஊகம். இந்தப் போரில் சோ.யூ வென்றதற்கு காரணம் "steam roller" tactic தான். அதாவது, ஒரு வரிசை வீரர்களை எதிராளி கொன்றால் அடுத்த வரிசை முன்னே செல்லும். இதில் இரு வீரர்களுக்கு ஒரு துப்பாக்கி என்றளவு ஆயுதப்பற்றாக்குறை ஆரம்ப காலத்தில். கூட்டத்தை வைத்துதான் வென்றார்கள். மற்றபடி மிகவும் அட்வான்ஸ்டாக அதுவரை இல்லை. அதற்கு பின்னரே நவீனமயமாக்கப்பட்டு ஒரு சிறந்த படையாக "Red Army" விளங்கியது.

அதற்குப்பின்னர் பிரெஷ்னெவ், குருஷேவ் தலைமையில் "குளிர்ப்போரில்" ஈடுபட்டு "ஸ்பேஸ் ரேஸ்", "ஆர்ம்ஸ் ரேஸ்" எல்லாம் அமெரிக்காவோடு சரிக்குசமமாய் விளையாடி அசைக்க முடியாத வல்லரசாக இருந்தது சோவியத் யூனியன் என்று மக்கள் நம்பினார்கள். ஆனால் உண்மை வேறுமாதிரி இருந்தது. தனிமனித சுதந்திரம் என்பது முழுக்கப் பறிபோனது. கிட்சன் டைனிங் டேபிள்களில் கூட வெளிப்படையாக அரசியல், சமூக விமர்சனங்களை வைக்கமுடியாத அளவிற்கு கட்டுப்பாடு. Komitet Gozudarstvennyi Bezopasnosti (KGB) - Committee for State Security என்ற சிவிலியன் அமைப்பு பற்றி எல்லோருக்கும் தெரிந்திருக்கும். இவர்களின் உள்நாட்டு உளவுப்பிரிவு மிகப் பிரபலம். ஆனால், இன்றளவும் பரவலாக அறியப்படாத ரஷ்யாவின் மிகப்பெரும் ரகசியம் GRU என்றழைக்கப்படும் Glavnoye Razvedyovatelnyie Upravleniye - Main Intelligence Directorate. கேஜிபியெல்லாம் ஜுஜுபி என்ற அளவிற்கு மிகப்பெரும் இராணுவ உளவு அமைப்பு இது. உலகெங்கிலும் இருந்தவர்கள் உள்ளூரில் இருக்கமாட்டார்களா என்ன? சோவியத் யூனியனில் இந்த இரு அமைப்புகளுக்கும் தெரியாமல் ஒரு அணுவும் அசையாது. paranoia என்பது in-born ஆகவே ரஷ்யர்கள் இருந்தார்கள். அடுத்தவர்களையென்ன, சொந்தங்களையே நம்புவதற்கு பயந்தனர். அந்தளவிற்கு எங்கும் ஊடுருவியிருந்தன இந்த உளவுத்துறைகள்.

ஏதேனும் சாதனை செய்தாலும் அடக்கியே வாசிக்கவேண்டிய சூழ்நிலை. உலகின் முதல் விண்வெளிப்பயணரான யூரி ககாரின் இதற்கு அருமையான எடுத்துக்காட்டு. விமான விபத்தில் இறந்து அரசு மரியாதையுடன் அடக்கம் செய்யப்பட்ட ககாரின் அவரின் அபரிமிதமான புகழின் காரணமாக அரசியல் கொலையே செய்யப்பட்டார் என்று சமீபத்தில் ஒரு டிவி சானலின் துப்பறியும் நிகழ்ச்சியில் சொன்னார்கள். இன்றைக்கு பெரிய அதிகாரியாக இருந்தவர், நாளை இருந்த தடமே இல்லாமல் காணாமல் போவார். எங்கே போனார்? என்ன ஆனார் என்று அதிகமாய் கவலைப்படும் நண்பர்களும், சுற்றத்தவர்களும் காணாமல் போவார்கள். இந்தியாவில் சுதந்திரமாய் வளர்ந்த நம்மாலெல்லாம் கற்பனைகூட செய்து பார்க்க முடியாத அடக்குமுறைகள் அமலில் இருந்தன. வெளிநாட்டில் இருந்து வந்த பயணிகள் tag செய்யப்பட்டு பின் தொடரப்பட்டனர். புகைப்படம் எல்லா இடங்களிலுமெல்லாம் எடுத்துவிட முடியாது. மதம் முற்றிலுமாக தடைசெய்யப்பட்டிருந்தது. பள்ளிகளில் லெனினும், ஸ்டாலினுமே நடமாடும் தெய்வங்கள், கட்சியே ஒரே தீர்வு என்று தினந்தோறும் போதனை செய்யப்பட்டது. இளவயதிலேயே கட்சிமேல் வெறி வளர்த்தது பெரிய சாதனை. இதனால் சோவியத் யூனியனின் கொள்கைகளுக்காக உயிரையும் கொடுக்கத் தயாராக சிவிலியன்கள் உண்டானார்கள். மேற்கத்திய பொருளாதார மற்றும் அரசியல் முறை பற்றிக் குறை கூறுவதே ஊடகங்களின் வேலையாயிருந்தது.

நியு யார்க், லண்டனிலெல்லாம் உள்ள ஏழை neighbourhood-கள் மற்றும் கலாச்சார சீர்கேடு (western decadence) குறித்த பிரச்சாரப் படங்கள் மற்றும் இந்த வகை சீரழிவிலிருந்தெல்லாம் சோவியத் மக்களை சோஷலிஸமும், கட்சியும், லெனினும் தான் காப்பாற்றினார்கள் என்று நிதமும் போதிக்கப்பட்டது. நமக்கு வேடிக்கையாய் இருந்தாலும், அதை மக்களும் நம்பத்தான் செய்தனர். சென்ஸார், ஸ்பின் டாக்டர்கள் புண்ணியத்தால் சோவியத் யூனியனின் பொருளாதார மற்றும் இராணுவத் தோல்விகள் இருட்டடிப்பு செய்யப்பட்டன. ஆரம்ப காலத்தில் ஆப்கான் போரின் முழுத்தோல்வியை பலரும் அறிந்தே இருக்கவில்லை. அமெரிக்காவுடன் போட்ட விண்வெளி, ஆயுதப்போட்டிகள் ஒரு புறமென்றால்... மறுபக்கம் பல ஆசிய, ஆப்ரிக்க நாடுகளை தங்கள் சோஷலிஸ சார்பு நிலையிலேயே வைத்திருக்க பணத்தை வாரியிறைக்க வேண்டியிருந்தது. அந்தச் செலவுகளுக்கு ஈடுகட்ட வழியில்லையென்றாலும் வீம்புக்காக போட்டி தொடர்ந்தது. புராதனமான கட்டமைப்பினால் தொழிற்சாலைகளில் உற்பத்தித்திரன் குறைந்தது. இழப்புகளை ஈடுகட்ட செயலற்ற நிறுவனங்களுக்கு subsidy என்ற பெயரில் அரசின் பணம் அள்ளிவீசப்பட்டது. தனியார் மயமாக்கலால் streamline ஆன மேற்கத்திய நாடுகள் போல் இல்லாமல் அரசு இயந்திரம் red tape-இல் சிக்கி செயலற்று efficiency என்பதில்லாமல் behemoth என்று சொல்வார்களே, அதே நிலைதான் கடைசியில். ஆனால், சாதாரணர்களுக்கு இது தெரிந்திருக்கவில்லை. இன்னமும் நல்லநிலையில் இருப்பதாகவே கருதினர் மக்கள். தெரிந்தவர்களும் அச்சுறுத்தலுக்கு பயந்து மௌனமாகவே இருந்தனர். 80-களின் இறுதியில் சில காரணங்களால் ஆளுகைக்குட்படுத்தப்பட்டிருந்த மத்திய ஆசிய மற்றும் கிழக்கு ஐரோப்பிய நாடுகளின் பிரிவினைக்குரல் கேட்கத்தொடங்கியது. ஆப்கான் போரின் முழு பாதிப்பும் புரிய ஆரம்பித்தது. பொருளாதார சீர்கேடினாலும் sustain செய்யமுடியாத தன் சொந்த எடையின் காரணமாகவே உடைவதற்கென்றே காத்திருந்தது சோவியத் யூனியன். "யானைக்கு அடிசறுக்கினா எப்படி அடிபடும் தெரியுமோனோ? அதத்தான எல்லாரும் எதிர்ப்பாக்குறா! நடக்காதுடி! நடக்காது!" என்று கௌரவம் சிவாஜி ஸ்டைலில் தத்தளித்துக் கொண்டிருந்த அந்த சமயத்தில் தான் வந்தனர் இருவர். ஒருவர் மேற்கூறிய காரணங்களின் கர்த்தா. மற்றவர் ஒரு அதிரடி ஆசாமி.


(தொடரும்)

குறிப்பு: எழுபதாண்டுகள் வரலாற்றை நான்கே பத்திகளில் சுருக்குவது இயலாத காரியம். ஆனால் மிகவும் அடக்குமுறைக்குட்படுத்தப்பட்டார்கள் என்பது அறியப்படவேண்டியது. மேற்கூறிய சோவியத் அடக்குமுறைகள் போன்ற விஷயங்கள் நான் என் ஆசிரியர்கள், ரஷ்ய நண்பர்கள் வழியாய் கேள்விப்பட்டவைதான். எவ்வளவு தூரம் உண்மை என்று அறுதியிட்டுச் சொல்லமுடியவில்லை. முன்னமே சொன்னபடி, முழுச்சுதந்திரத்துடன் வளர்ந்த நம்மால் நினைத்தும் பார்க்கமுடியாதவை. ரொம்ப dry யாகப் போகுதேன்னு நறநறப்பவர்கள் இன்னும் ஒரெயொரு பதிவு மட்டும் பொறுத்தருளுமாறு கேட்டுக்கறேன். ரஷ்யர்களின் மனநிலையை புரிந்துகொள்ள இவை உதவும் என்பதென் எண்ணம். டேங்க்ஸ் பா..

முந்தைய பாகம்

இரும்புத்திரைக்கு பின்னாலிருந்து - 1: some facts

இதோ நீங்கள் ஆவலுடன் எதிர்பார்த்த அடுத்த மெகாத்தொடர் ஆரம்பம். திருமுருகன், திருச்செல்வனுக்கெல்லாம் நான் அடுத்தபோட்டியாளர்னு மண்டபத்துல பேசிக்கிறாங்க இல்ல? அதனால தான். அக்காவோட நியுஸிலாந்து பற்றிய பகுதிகளின் பாதிப்பு நிறைய இருக்கும் பொறுத்துக்கோங்க.

முதல்ல சில பாக்ட்ஸ் - சி.ஐ.ஏ விலிருந்து...

உலகின் மிகப்பெரிய நாடு. மொத்த நிலப்பரப்பு: 16,995,800 சதுர கி.மீ (ஒரு ஒப்பீடுக்காக இந்தியாவின் நிலப்பரப்பு : 2,973,190 சதுர கி.மீ. அமெரிக்காவை விட ஒன்றேமுக்கால் மடங்கு பெரியது. ஐரோப்பா, ஆசியா ஆகிய இரு கண்டங்களிலும் இருக்கிறது)

ரோசியா - Россия [Rossiya] / Russia என்பது ஷார்ட் பார்ம்.

லாங் பார்ம்னா Российская Федерация [Rossiyiskaya Federatsiya] / Russian Federation

அரசியலமைப்பு: federation
ஜனாதிபதி: விளாடிமீர் விளாடிமீரோவிச் பூடின் / Владимир Владимирович Путин (Vladimir Vladimirovic Putin)
பிரீமியர்: மிஹாயில் எபிவோவிச் ப்ராட்கோவ் / Михаил Эфимович Фрадков (Mikhail Yefimovic Fradkov)
இணைப் பிரிமீயர்: அலெக்ஸாண்டர் டிமிட்ர்யேவிச் ஷுகவ் / Александр Дмитревич Жуков (Aleksandr Dmitreyevic Zhukov)

சுதந்திர தினம்: 24 ஆகஸ்ட் 1991
தேசிய தினம்: 12 ஜூன்

தலைநகரம்: மஸ்க்வா / Москва [Moskva] / Moscow

மற்ற முக்கிய நகரங்கள்: சான்க்ட் பீட்டர்புர்க் ( Saint Petersburg), நோவோசிபிர்ஸ்க் (Novo Sibirsk), வ்ளாடிவோஸ்டாக் (Vladivostok), துலா (Tula), வோல்காகிராட் (Volgograd), ரோஸ்டோவ் (Rostov), த்வேர் (Tver), நீஷ்னி நவ்கோரத் (Nizhny Novgorod)

மக்கள்தொகை: 143,420,309 (ஜூலை 2005)
மக்கள்தொகை வளர்ச்சி விகிதம்: -0.37% (2005 est.)
மொழி: ரஷ்யன் : எழுத்து: சிரில்லிக் (Cyrillic)
படிப்பறிவு: ஆண்கள் - 99.7%; பெண்கள்: 99.5%

பணவீக்கம்: 11.5%
பணம்: ரூபிள்ஸ் - Rubles = 28.5 ரூபிள்ஸ் / US$
தொலைபேசி இலக்கம்: 7
மாஸ்கோ: +7-095
செயிண்ட் பீட்டர்புர்க்: +7-812
வலை இலக்கம்: .ru
பயிர் செய்யப்படக்கூடிய நிலப்பரப்பு: 7.33%
permanent crops: 0.11%
other: 92.56% (2001)

சீதோஷ்ண நிலை: sub tropical லிருந்து sub arctic வரை
உயரமான இடம்: கோரா எல்ப்ரஸ் (ஐரோப்பாவின் மிக உயர்ந்த இடம்)

மதங்கள்: Russian Orthodox, Muslim, மற்றவை

இரயில்வே - மொத்தம்: 87,157 km
அகலப்பாதை: 86,200 km ஐரோப்பிய அளவு (40,300 கிமீ மின்சாரமயமாக்கபட்டவை)

நெடுஞ்சாலை: paved: 362,133 km

எண்ணெய் வளங்கள்: proved 69 billion bbl
இயற்கை வாயு: proved 47 trillion cu m (2003)

ஏற்றுமதி: $162.5 billion
ஏற்றுமதி செய்யப்படும் பொருட்கள்: பெட்ரோலியப் பொருட்கள், கனிமங்கள், ரசாயனப் பொருட்கள், இராணுவ தளவாடங்கள்

மொத்தக் கடன்: $169.6 billion
வேலையில்லாதோர்: 8.3%
GDP: purchasing power parity - $1.408 trillion

முக்கிய படைகள்: Ground Forces (SV), Navy (VMF), Air Forces (VVS); Airborne Troops (VDV), Strategic Rocket Troops (RVSN), and Space Troops (KV) are independent "combat arms," not subordinate to any of the three branches

ரிசர்வ்-களையும் சேர்த்து available ஆட்படை: 18-49 வயதுக்குட்பட்ட ஆண்கள்: 35,247,049 (2005 est.)
17 வயதிலிருந்து ஆண்களுக்கு இரண்டு ஆண்டுகள் கட்டாய மிலிட்டரி recruitment

கைத்தொலைபேசிகள் எண்ணிக்கை: 17,608,800 (2002)

--
சரி, படிச்சு போரடிச்சிடுச்சா? இவ்வளவு பெரிய ரஷ்யாவிற்கு நான் வந்தது 1998-ல். அன்றிலிருந்து இங்கு தான் வாசம். நான் சென்ற முக்கிய நகரங்கள்னு பார்த்தா மஸ்க்வாவும், செயிண்ட் பீட்டர்ஸ்புர்க்கும் தான். இரும்புத்திரையின் பின்னாலிருந்த ரஷ்யா சோவியத் யூனியன் உள்நாட்டு போரில் சிக்கி உடைந்து, பல துண்டுகளாகி இன்று ரஷ்யா மீண்டும் தலைநிமிரும் நேரம். 98-ல் ஏற்பட்ட economic depression-ஐயும் சமாளித்து, ஜனநாயகத்திற்கு சில காலம் வேட்டு வைத்து, தன் படைபலத்தினால் மற்ற நாடுகளை மிரட்டி, இன்னமும் உலக அரங்கில் ஒரு முக்கிய உறுப்பினராக திகழ்கிறது: இதெல்லாம் நான் இருந்த காலத்தில் நடந்தது. ஏதோ ரஷ்யாவில் நான் பார்த்தவை நினைப்பவை நடப்பவை பற்றியே இந்தத் தொடர்.

(தொடரும்)

மாஸ்கோ மே - 9: படங்கள்: 2

ரெண்டு வார்த்தை எழுதலேனா தமிழ்மணத்தில வராதே! மே-9 இரண்டாம் உலகப் போரில் ரஷ்யா வெற்றி பெற்றதன் நினைவு விழாவில் எடுத்தது. சுஹோய் எனப்படும் ஜெட்டுகள் இவை. இந்தியாவிடமும் நிறைய உண்டு. எவ்வித முன்னறிவிப்புமின்றி திடீரென்று தோன்றியபடியால் போகஸ் அவ்வளவு சரியாக இல்லை..

இதே நிகழ்ச்சி குறித்த முந்தைய பதிவு இதோ

மாஸ்கோ மே - 9: படங்கள்: 1

படங்காட்டி பல நாட்கள் ஆகிவிட்டபடியால்...ஒரு படப் பதிவு

கடந்த மே 9-ஆம் தேதி மாஸ்கோவில் இரண்டாம் உலகப்போரில் சோவியத் யூனியன் வெற்றி பெற்ற 60-வது நினைவுதின நிகழ்ச்சிகள் நடைபெற்றன. இதில் கலந்து கொள்ள புஷ், ஷிராக், ஷ்ரோடர், நம் மன்மோகன் சிங் உட்பட 60 நாடுகளின் தலைவர்கள் வந்திருந்தனர். அந்த நிகழ்ச்சிக்கு கண்டிப்பாக முன்னிலை வகிக்க வரவெண்டுமென்று எனதருமை நண்பர் பூடின் அழைப்பு விடுத்திருந்தாலும், என் modesty-இன் காரணமாய், கூட்டத்திலேய் ஒருவனாய் நின்றிருந்தபோது எடுத்த படங்கள். :)

Red Square-இல் உள்ள St.Basil's Cathedral-க்கு பின்புறம் எடுத்தது. நான் சொன்ன உலகத்தலைகள் எல்லாம் அந்தப் பக்கம், அதாவது red square-இல் அமர்ந்திருந்தார்கள்.