152. குலுக்குநடிகை ஜலஜாஸ்ரீ அறிக்கை

தமிழகத்தின் முன்னாள் கனவுக்கன்னி, லட்சோப லட்சம் தமிழ் இளைஞர்களின் காதல் இளவரசி, இன்றைய குலுக்ஸ் ஜில்பாஸ்ரீயை பமகவிற்கு, சீ, தமிழ் கலைச்சேவைக்கென்றே பெற்றெடுத்த தெய்வத்தாய் ஜலஜாஸ்ரீ இன்று பமகவிற்கு ஆதரவாய் வெளியிட்டுள்ள அறிக்கையாவது.

---

மே 4, 2006
ஸ்விஸ்ஸாபுரம், செயிண்ட் மாரிட்ஸ்

வணக்கம் தமிழர்களே! என் இளைஞர்களே! எனக்கு கோவில் கட்டி கும்பிட்ட நான் உங்களை என்றும் மறவேன். சிறிதுகாலம் கலைச்சேவையிலிருந்து விடைபெற்றுக்கொண்டு, இங்கு வந்து எனது ஆன்மிக குருவான சுவாமி குஜிலியானந்தாவிற்கு தொண்டுகள் செய்துவருகிறேன். தமிழகத்தேர்தல் நெருங்குகையில், தமிழகத்தில் என் வாரமலர் செண்டர் ஸ்ப்ரெட்டை கட் செய்து பீரொவின் உள்பக்கத்தில் மறைவாய் ஒட்டி கற்பூரம் காட்டி நாள்தோறும் வழிபடும் என் ரசிகர்களுக்கு இத்தேர்தல் சமயத்தில் சில விஷயங்கள் சொல்லவேண்டும் என்று நினைத்ததன் விளைவே இது.

ஒரு டாக்டராகி சூடான் சென்று மருத்துவத்தொண்டு புரியும் வாய்ப்புகளும், துபாய் சென்று கலைச்சேவை ஆற்றும் சந்தர்ப்பங்களும், கம்பூட்டர் படித்து ஆஸ்திரேலியா செல்ல ஸ்கோப்புகளும் இருந்திருந்தாலும், தமிழ்த்திரைப்படவுலகை மலையாள திரைப்பட உலக அளவிற்கு தரமானதாக்கவேண்டும் என்று கோடிக்கணக்கில் உங்களிடமிருந்து அன்று வந்த அன்புக்கட்டளைகளினால், ஐந்தாம் க்ளாஸ் பெயிலாகிவிட்டு, நான் கலைச்சேவையில் தற்செயலாக, ஆக்ஸிடெண்டலாக, தொபுக்கடீரென குதித்தேன். வெள்ளித்திரையில் மட்டுமன்றி வண்ணத்திரையிலும் நானே செண்டரில் இருந்தேன் உங்கள் பேராதரவோடு. தமிழகமெங்கும் எனக்கு தேவாலயங்கள் எழுப்பி கும்பாபிஷேகம் செய்து எனக்கு உங்கள் நன்றிக்கடனை தெரிவித்தீர்கள்.

இன்று தினமும் எனக்கு வரும் லட்சக்கணக்கான கலாரசிகர்களின் கோரிக்கை ஒன்றுதான். கலைச்சேவையில் வெற்றித்தடம் பதித்த தாயே, நீ (நான் தான்) மக்கட்சேவையை வெற்றிடமாய் விட்டது ஏனோ என்று இரத்தத்தில் எழுதிய கடிதங்கள் அனுப்புகின்றனர் என் ரசிகர்கள். என் நெஞ்சக்கூடு வருத்தத்தில் பொங்கியது. அதனால் நம்மெல்லாருக்கும் குருவான சுவாமிஜியிடம் இதைப் பற்றி அனுமதியும் அறிவுரையும் கேட்டிருந்தேன். அவரும் அவருக்கே உரிய அன்போடு வருகின்ற தேர்தலுக்காக என்னை முற்றிலும் தாயாராக்கியிருக்கிறார்!

தமிழக ரசிகர்களே! உங்களிடம் ஒன்று கேட்பேன். ஊசி போட சான்ஸ் கிடைத்தும் உங்களுக்காக பாசிவிற்பவளாய் ஆட்டம்போடும் என் மகள் ஜில்பாஸ்ரீக்கு நீங்கள் செய்யும் நன்றிக்கடன் என்ன? உரல் எழுத வாய்ப்புகள் கிடைத்தும் உங்களுக்காக உரலிடித்து ஆடிய எனக்கு நீங்கள் செய்யும் கைம்மாறு என்ன? எங்கள் வாழ்க்கைகளையே உங்களுக்காக அர்ப்பணித்துக்கொண்டோம். இப்போது வெறும் ஆட்சியைத்தானே கேட்கிறோம். எங்கள் கட்சி பமக விற்கு ஓட்டு போட்டு ஆட்சியில் அமர்த்துங்கள். வண்ணத்திரையில் நடுவில் வந்த நாங்கள் தினமூடியின் முதல் பக்கத்தில் வருவோம். வந்து உங்கள் மனதின் கலைப்பசியைத் தீர்ப்போம் என்று வாக்குறுதி அளிக்கிறேன்.

ஓம் குரு குஜிலியாய நமஹ!

---
நடிகை ஜலஜாஸ்ரீ அறிக்கை முற்றிற்று.