ஹிந்தியா? தமிழா?

சிறிது நாட்களுக்கு முன் இந்த விவாதம் எனக்கும் என் மஹராஷ்ட்ரிய நண்பருக்கும் நிகழ்ந்தது. அவரின் கேள்வி: அதன் கிட்டத்தட்ட சரியான தமிழாக்கம்.

"தமிழர்கள் ஏன் தங்களை மற்ற இந்திய மாநிலங்களைப் போல் கருதாமல், இன்னும் தாய்மொழி பற்றி மட்டுமே பெருமிதப்பட்டுக் கொண்டிருக்கிறார்கள்? இந்தியைக் கற்றுக்கொள்வது ஒன்றும் தமிழ் மொழிக்கு நேரடியாக தீங்கு விளைவிக்கக்கூடியதன்று. அந்நிய மொழியான ஆங்கிலத்தை இரண்டாம் மொழியாகக் கற்றுக்கொள்ளுவதற்கு காட்டும் ஆர்வத்தை ஏன் இந்தி கற்றுக்கொள்வதற்கு காட்ட மறுக்கிறீர்கள்? மராட்டியையும் ஆங்கிலத்தையும் கற்கும் அதே தறுவாயில் ஹிந்தியையும் கற்கிறோம் நாங்கள். இது வடநாட்டிலுள்ள பல மாநிலங்களுக்கும் பொருந்தும்.

ஏன் ஆந்திர, கர்நாடக மற்றும் கேரள மாநிலத்தோர் இத்தகைய மொழிவெறி என்றே மிகைப்படுத்திக் கூறக்கூடியப் பற்றைக் காட்டுவதில்லை? மொழி என்பது முற்காலத்தில் எப்படியோ! ஆனால் இன்றைய நிலையில் மொழியின் அடையாளம் பலர் புரிந்து கொள்வது ஒன்றே மிக அவசியமாகிறது. இதில் ஹிந்தியை கற்றுக்கொண்டால் என்ன பாவம்? இந்நாட்டில் பலராலும் பேசப்படும் மொழி ஹிந்தி. ஹிந்தியின் ரிஷிமூலம் நதிமூலம் பார்க்கவேண்டியதில்லை. இப்போதைக்கு தேவைப்படும் மொழி என்றளவில் கற்கலாமே. அதிலென்ன தவறு?

சரித்திரத்தின் வழி பார்த்தால் சம்ஸ்கிருதம், தமிழ், ஹிப்ரூ, லாத்தீன் தவிர வேரேதெயுமே கற்பது பயனற்றது. இன்னும் சொல்லப்போனால், கற்காலத்து மனிதர்கள் ஒலி வழியே மொழியின்றி பேசிக்கொண்டனர். அவ்வாறெனில் அம்மொழியே சிறந்ததென்று கூறமுடியுமா? 2000 வருடங்களுக்கு முன் தமிழில் தொல்க்காப்பியம் உருவானதென்று கூறுவது இந்தியர்களெல்லாம் பெருமை அடையச் செய்யும் விஷயம். அப்பேர்ப்பட்ட மொழி இன்றளவினும் பேசப்படும் மொழியாக இருப்பது இன்னமும் பெருமையளிக்கிறது. ஆனால், ஒரே கூண்டுக்குள் பறக்கும் பறவையாக இன்னமும் ஏன் பறந்து கொண்டிருக்கிறீர்கள்? அரசியல் மட்டுமே இவ்விஷயத்தில் காரணமா?

தமிழ்நாட்டில் மட்டுமே இன்றும் ஹிந்தியென்று சொன்னால் பூகம்பமே ஏற்படுகின்றது. அரசியல் மட்டும் காரணமில்லையெனில் தமிழ் மட்டுமே உலகில் சிறந்த மொழியென்ற நினைப்பும் அதிலுண்டா? மொழியென்பது வெறும் communication device தானே. முன்னர் BASIC பயின்றோர் C பயின்றனர். இப்போது C++ பயில்கின்றனர். இவ்வாறு பயிலும் போது BASIC ஓ C-ஓ இப்போதைக்கு உபயோகமில்லாவிடினும், அவை பயனற்றதென்று எவரும் கூறுவதில்லை. அது போலவே மொழியும். அவ்வாறிருக்கையில் தமிழ், ஹிந்தி பற்றி மட்டுமேன் இவ்வளவு சர்ச்சை?"

இதைப் பற்றி உங்கள் கருத்துக்கள் என்ன??